لو بتمشي بعربيتك في شوارع مكسرة، وحفر مش عارف آخرها فين، وغيرة من الحاجات اللي بتخلي عربيتك حرفيا ترقص وهي ماشية، بس مابترقصش ولا حاجة

اعرف انك عندك مساعدين شاطرين

لو بترقص بقى والموضوع قالب جوه العربية حفلة سمر،  يبقى انت عندك مشكلة في ممتص الصدمات، اللي هو بالمصري كدة المساعدين

انت تعرف ايه هو ممتص الصدمات ده وشكله ايه أصلا؟

ايه هو ممتص الصدمات (المساعدين)؟

ممتص الصدمات او المساعدين بالمصري، هو عبارة عن أسطوانة طويلة شوية بتربط بطاحة العربية بالعفشة. الأسطوانة دي بيكون جواها زيت، ومكبس بيتحرك بشكل عمودي جوه الأسطوانة فيه فتحات بيمر منها الزيت ده

ممتص الصدمات/ المساعدينمصدر الصورة

بيعمل ايه بقى ممتص الصدمات؟

دور ممتص الصدمات/ المساعدين :

كتير مننا مايعرفش دور وأهمية ممتص الصدمات في العربية، والناس الجديدة على العربيات بالذات ماتعرفش بيكون موجود فين. رغم إنه جزء مهم جدا من أدوات السلامة والأمان في العربية، فجمعنا أبرز أدواره في 4 نقط، هما:

1- ثبات مستوى السيارة على الطريق من غير أي شعور باهتزاز طول ما انت سايق أيا كانت الحركة

2- تماسك الإطارات وثباتها، يعني ولا تتزحلق ولا يبقى في أي مشكلة في احتكاك الإطار ويخليها متماسكة مع الأرض

3- ثبات عجلة القيادة وانت بتتحرك، وده بيكون نتيجة طبيعية لثبات مستوى العربية وتماسك الإطارات وسهولة احتكاكها بالأرض

طيب ايه الفرق بينه وبين السوست؟  

مفيش فروق، بالعكس، المساعدين بيكون راكب عليها سوسته تخفف من حركتها، وتساعد في نفس الوقت على امتصاص الصدمات الخفيفة

4- تقليل مسافة الفرامل، ودي من الحاجات المهمة جدا وانت سايق، ان لو حصل أي شئ مفاجئ تكون قادر تسيطر على العربية وتوقفها في ، أسرع وقت

والعكس بقى لو المساعدين في العربية فيهم مشكلة، ساعتها هتلاقي مسافة المكابح فيها بتكون أطول

يعني بالمقارنة بينها وبين العربية اللي المساعدين فيها في أحسن حال، هتلاقي ان العربية الأولى بتقف أبعد من العربية التانية، وده طبعا أمان أكتر

ايه هو التأمين الإجباري على العربية والفرق بينه وبين التأمين التكميلي

امتى ممتص الصدمات/ المساعدين بيبوظ؟

  • – لما يسرب زيت، أو زي ما بيقولوا (ضرب زيت)

لما الزيت اللي جوه الأسطوانة يسرب ويخرج بره الأسطوانة، دي مشكلة كبيرة، لأن الزيت ده هو اللي بيعمل تقل للإسطوانة وبالتالي توازن للعربية لما تعدي بيها من مطب أو تدخل ملف، ومايخليهاش تتخبط منك

  • – لو خف

الزيت زي ما بيسيب ترسبات، هو كمان مع طول فترة وجودة جوه الأسطوانة بيعمل تآكل لفتحات الزيت اللي بتكون في المكبس، وبعد فترة وبعد التآكل ده ما بيزيد، الزيت بيتحرك أسهل جوه الأسطوانة من خلال المكبس وبالتالي مابيأثرش في حركته، وده بيخلي ممتص الصدمات اللي هو المساعدين حركته يخف، فـ مايمتصش الصدمات بالشكل المطلوب وبيبقى زي عدمه

– لو ابتدى يحجر

المساعدين بيحجر لسببن:

1- المكبس اللي جوه المساعدين اللي بيساعد على الصعود والهبوط عشان يعمل توازن للعربية بمساعدة الزيت، المكبس ده بعد استعمال المساعدين لفترة طويلة، الزيت اللي جوه المكبس ده بيكون روق كل الشوائب والترسبات اللي فيه، ومع الوقت، الترسبات والشوائب دي بتسد فتحات الزيت .. فـ ده اول سبب

2- السبب التاني بقى، الإسطوانة لو اتخبطت لأي سبب من الأسباب، ولو خبطة بسيطة انت ماخدتش بالك منها، المكبس اللي جوه الإسطوانة بقى الخبطة دي بتأثر على حركته جوه الإسطوانة وفي لحظة من اللحظات بيتحشر ومابيقدرش يتحرك

الحاجات دي بتظهر ازاي على العربية؟

1- العربية على غير العادة مستواها مش مظبوط

عربيتك مايلة لقدام ولما بتدخل ملف أو تعدي مطب بتلبس والعربية بتتخبط منك أو بتلاقيها طارت في الهوا وماعرفتش تسيطر عليها؟

بس يا سيدي، تبقى العربية مستواها مش مظبوط والمساعدين فيهم مشكلة ولازم تغير المساعد اللي فيه المشكلة

2- لما تلاقي تآكل في الإطارات في أماكن مش متساوية

بما اننا بنتكلم على عربية مستواها مش متساوي، ففي عجلة هيكون عليها تقل أكتر من التانية، وبالتالي هيحصلها تآكل أسرع

3- الإطارات ماتبقاش متماسكة

تحس ان كاوتش العربية (اطار السيارة) مش ثابت، أو تكون في ملف وتلاقي العربية بتحدف وتسيطر عليها بصعوبة، مع تلف العجلة في وقت أقصر من عمرها الافتراضي

أول ما تحس ان عجلة القيادة بتتهز منك والإطارات مش متماسكة وبتعاني لما بيحصلها احتكاك بالأرض، اعرف ان في مشكلة في المساعدين.

4- العربية بتتهز فترة طويلة

من الحاجات اللي بتظهر ممتص الصدمات شغال كويس أو لأ، انك تهز العربية بإيدك لفترة شوية وتسيبها.

لو العربية اتهزت مرة أو مرتين وبعدين ثبتت .. فخلاص المساعدين بتوعك تمام يا برنس وتقدر تتطمن

أما لو الاهتزاز زاد عن كدة؟

لأ .. ساعتها لازم توديها لميكانيكي يبصلك على المساعدين، ولو لاقيت في أسطوانة عاوزة تتغير، لازم تعمل كدة

5- اللي راكب العربية مش مرتاح

مع الطلعات والنزلات سواء حفرة أو على أرض مش متساوية، لو لاقيت نفسك بتطلع وتنزل مع العربية وانت راكب جوه، يبقى المساعدين مش مظبوطين، لأن وظيفته الأساسية انه يخلي رحلتك أمتع مش بتتعمل صح، وده يأكد المشكلة

تعمل ايه لو اتأكدت ان ممتص الصدمات/ المساعدين باظ؟

في الحالة دي لازم تروح للميكانيكي يغيره، لأن المساعدين، أو خلينا نقول بقى ممتص الصدمات لأن المعنى هنا أقوى، دوره في انه يحافظلك على ثبات العربية طول الوقت وثبات العجل على الأرض، ده بيحميك من خطر كبير بلاش نجازف ونحط نفسنا فيه

خد فكرة كمان عن:

مرايات العربية اعرف أهميتها وازاي تظبطها كل يوم

تتعامل ازاي مع انفجار إطار السيارة أو كاوتش العربية على الطريق؟

العربية الكهربا .. تاريخها ومميزاتها لو بتفكر تشتري

 

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *

‫شاهد أيضًا‬

كيف تحدد عمر اطارات السيارة و6 إشارات تدل على ضرورة تغييرها فورا

اطارات السيارة من الأجزاء الهامة جدا، بل تعد الأهم على الإطلاق. فهي الجزء الوحيد في السيار…