2019-10-29

ايه هو التأمين الإجباري على العربية والفرق بينه وبين التأمين التكميلي

التأمين على العربية

ناس كتير من اللي عاوزين يشتروا عربية في مصر، أخر حاجة ممكن تيجي على بالهم هو التأمين على العربية، وبيفاجئوا انه اجباري في رسوم الرخصة والتجديد، ده لو العربية مستعملة.

ولو العربية بتشتريها جديد، هتلاقي المكان اللي بتشتري منه بيعرض عليك تأمن مع شركات تبعهم ويشرحلك الأنواع المختلفة وانت مش عارف تفرق بينهم فيتضحك عليك

فأصبح مفهوم التأمين عند البعض انه مبلغ بتدفعه كل فترة زمنية محددة عشان حاجة ممكن تحصل وممكن لأ، فهي فلوس على الفاضي

بس هل قسط  فلوس التأمين على العربية  بدفعه على الفاضي؟

طبعا لأ، ولأن ده موضوع مهم جدا، وممكن يكون سبب في تقليل حوادث عربيات كان ضحيتها في 2018 سب حوالي 8000 بني أدم، قررنا نكتبلكم تقرير شامل عن التأمين على العربية في مصر.

الأول كدة

ازاي جت فكرة التأمين على العربية وامتى؟

زمان قبل م التأمين يكون مكاتب متخصصة ووسائل النقل ماكنتش بتزيد عن الناقة والسفينة، كانوا التجار عشان يبعتوا بضاعتهم من بلد لبلد، كانوا بيخسروا كتير لو البحر الرياح خمسنت ولا الجمل جيه في نص الصحرا ونخع لعصابات الطريق

عشان كدة زمان وصلوا لحل حلو أوي، وهو إن البضاعة اللي بتسافر على سفينة مثلا، يوزعوها على أكتر من سفينة، وخسارة كمية صغيرة ولا كميتين بس الباقي يوصل بالسلامة، أبرك من خسارة كاملة

ودي تقريبا كانت وسيلة التأمين الأولى

لفت الأيام وبقى الموضوع موثق أكتر في قوانين ودفاتر ورسوم بتتدفع وأنواع من التأمينات، تعالوا نتعرف عليهم…

ركن السيارة في الشتاء مشكلة حلها هنا بالتفصيل

أنواع التأمين على العربية:

التأمين على العربية في مصر نوعين:

1- تأمين إجباري

2- تأمين تكميلي

التأمين الإجباري على العربية:

 لو جينا نرتب المتضررين من حوادث العربيات اللي حصلت، هيكون كدة بالترتيب:

  1. 1- المشاة (لو خبطت حد خطأ أو عمد بقى)
  2. 2- صاحب العربية اللي اتخبطت في حالة انها مركونة
  3. 3- صاحب العربية اللي ماشية صح في حالة حد تاني كسر عليه أو خبطة بالغلط أو قصد

غالبا دول أكتر 3 فئات بتتضر بدون أي ذنب ليها، وأكترهم ضررا بلا منازع هما المشاة. طيب الناس دي لما تموت أو يحصلها حاجة واللي خبطهم هرب أو مش قادر يدفع مبلغ للتعويض، مين هيعوضهم؟

الدولة لما فكرت في الموضوع ده، وللحفاظ على أرواح الناس، بدأت تحط قوانين إجبارية للتأمين على العربيات. وهو عبارة عن مبلغ بتدفعه كل مرة بتجدد فيها رخصة العربية

المبلغ ده بيغطي المسؤولية المدنية اللي عليك ناحية حد توفى أو اتصاب وانت كنت بس مش قاصد. يعني بمعنى أصح اللي انت خبطته لو اتوفى أو حصله اصابة، شركة التأمين اللي بتدفعله التعويض زي الوسيط بالظبط

المهم انك أول الحادثة ما تقع، تبلغ إدارة المرور اللي انت تابع ليها باللي حصل وتثبت الحادثة بالتاريخ والتفاصيل، وده يكون بالكتير خلال اسبوع

على فكرة، قانون التأمين على العربية الاجباري ده مش قانون جديد، ده صدر في 2007 ولسه شغال لحد النهاردة.

معايا طفل في العربية أعمل ايه؟ .. شوية نصايح مفيدة

دلوقتي احنا لسه عندنا حاجات تاني في العربية محتاجين نأمن عليها صح؟ .. هنحتاج هنا تأمين إجباري برضة؟

لأ .. ده هيكون اختياري، وليك الحرية فيه، واسمه يا باشا التأمين التكميلي للسيارات

ايه هو التأمين التكميلي على العربية؟:

هو تأمين بيغطي أي تلفيات كلية أو جزئية بتحصل للعربية نفسها. والله حصل بقى حادثة ولا اتسرقت ولا العربية اتحرقت، ساعتها وحسب نوع التأمين اللي هتختاره، شركة التأمين هتصلحلك ده

هو التأمين التكميلي واحد لأي عربية؟

لأ

أنواع وثائق التأمين التكميلي على العربية:

التأمين التكميلي أنواعه بتتقاس على حسب نوع العربية نفسه، يعني في:

– وثيقة تأمين على سيارة خاصة

 الوثيقة دي بتغطي العربية اللي بتستخدمها بشكل شخصي، يعني من البيت للشغل للنادي، وهكذا

– وثيقة تأمين على سيارة تجارية

ودي لأي عربية بتشتغل ويجي من وراها فلوس. عربية نقل بقى أو تاكسي أو جرار زراعي .. حتى الإسعاف والمطافي كمان

– وثيقة تأمين على موتوسيكل

طبعا الموتوسيكل في العموم بقى ليه أشكال كتير واستخدامات أكتر. وثيقة التأمين على الموتوسيكل دي بتغطي كل وأي حاجة تخص الموتوسيكل بجميع أنواعه واستخداماته

– وثيقة تأمين على الرخصة التجاري (اللوحات المعدنية)

وثيقة الرخصة التجاري دي ممكن تكون غريبة عليك، بس مش غريبة أبدا على معارض العربيات لأنها تخصم.

رخصة التجاري دي بتكون موجودة على العربيات الجديدة اللي للبيع، سواء وكيل كبير بيتعامل مع تجار او تجار بيتجاروا قطاعي.

طب وبتنفع امتى؟

بتنفع مع أي خبطة أو حادثة تحصل للعربية في الأوقات دي مثلا:

  • – وقت استلام العربي من الوكيل
  • – لما بيجربها عميل
  • – في طريقها لقسم المرور عشان تترخص

أنواع التغطية التأمينية في التأمين التكميلي على العربيات:

غير التأمين الإجباري، في التأمين التكميلي تقدر تختار بين أكتر من نوع، زي:

1- في حالة الحرائق والسرقة

لو بتركن عربيتك في جراج أو تحت بيتك ديما او في جراج مول أو جراج مؤسسة معروفة، في مكان معلوم يعني، وخايف يحصل لاقدر الله سرقة أو حريقة في العربية بقصد أو بدون، تقدر تعمل تأمين تكميلي على عربيتك مخصوص للحرائق والسرقة بس

والنوع ده من التأمين بيغطي أي خساير تحصل للعربية في الحالتين دول بس

2-   التأمين الشامل على العربية

التأمين ده بيغطي كل التلفيات والأضرار اللي ممكن تحصل لعربيتك نتيجة أي حاجة بقى، سواء حريق أو سرقة لجزء من العربية أو حاجة جواها أو سرقة العربية كاملة

كمان أي حاجة ممكن تسببها لأي حد تاني من غير قصد في حادثة تكون انت السبب فيها

ضيف على ده إن لو حد حب يأذيك وكانت العربية هي وسيلته الوحيدة، لو أثبت ده لشركة التأمين هما بيتكفلوا بتصليح العربية أيا كان بقى ايه اللي حصل.

3- في حالة خطر الظواهر الطبيعية

في العادي، لو المطر غرق عربيتك أو فرع شجرة وقع على العربية وانت عامل مثلا تأمين شامل على العربية، التأمين مش بيغطي الظواهر الطبيعية

عشان كدة، عندك اختيار انك تطلب ده كـ ميزة إضافية على عقد التأمين، وبتدفع قصاد ده مبلغ زيادة

على فكرة:

في ناس كتير بتلاقي إن دفع مبالغ ماليه عشان لو حصل حاجة ممكن ماتحصلش، انه فلوس على الفاضي. بس تجارب ناس كتير مع التأمينات في حالة لاقدر الله الحوادث اللارادية، بتشيل حمل تقيل جدا من عليهم

فالموضوع في العموم تجربة تستحق جدا.

خد فكرة كمان عن:

7 نصايح مهمه لو سايق في المطر

أهم أسباب زيادة استهلاك البنزين في عربيتك

رخصة القيادة الدولية .. شروطها وازاي تطلعها في خطوات بسيطة

 

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *

‫شاهد أيضًا‬

كيف تحدد عمر اطارات السيارة و6 إشارات تدل على ضرورة تغييرها فورا

اطارات السيارة من الأجزاء الهامة جدا، بل تعد الأهم على الإطلاق. فهي الجزء الوحيد في السيار…