2019-10-27

اعرف تعمل ايه بالتفصيل لو السيارة غرقت في السيول

السيارة غرقت في السيول

فصل الشتاء رغم إن عمره كله مايزدش عن 4 شهور في السنة، إلا انه بيأثر على العربية بشكل واضح. خصوصا بقى في الكام أسبوع اللي بيشتغلوا مطر من خفيف لشديد، فتلاقي العربية/ السيارة غرقت في السيول وانت لا حول ليك ولا قوة

طيب تعمل ايه في الحالة دي؟

مش هتعمل غير كام خطوة بسيطة حسب حالة العربية واحتياجها، لأن غرق السيارة في السيول بيكون في حالتين:

الأولى: والعربية ماشية في الطريق

التانية: إن العربية مركونة في مكان غرقان

الحالتين ممكن يكون ليهم نفس المشكلة، بس تختلف من موتور شغال وماشي في الماية لموتور واقف مابيتحركش، فتعالوا نتكلم الأول عن حالة:

السيارة غرقت في السيول أثناء القيادة:

عربية بتتحرك وفجأة مطر شديد فالماية اتجمعت وبقت واصلة للرصيف وبتزيد، ده كله بيساوي توتر وقلق .. وأكمل ولا أقف!! .. واسئلة كتير مش عارف حلها

تتعامل ازاي لو السيارة غرقت في السيول وبهدوء؟

خليني في البداية أقولك إنك عشان تكون سواق شاطر، لازم تكون عارف أماكن أجزاء عربيتك وحافظها كويس. وتعرف إن في جزئين مهمين جدا في عربيتك ماينفعش يوصلهم ماية

1- فلتر الهوا

وده بيكون في الجزء الأمامي من العربية

2- فتحة الشكمان

وده بيكون في الجزء الخلفي

ليه؟ واشمعنى دول!

لأن الاتنين دول بيوصلوا مباشرة على المحرك وغرفة الحرق وكل الحاجات اللي بتحرك العربية من جوه، ولو وصلهم ماية لاقدر الله، المحرك هيبوظ والبساتم هتتكسر والزيت هيختلط بالماية وهيحصل صدا لأكتر من جزء وشغلانة كبيرة أوي سعادتك

تعمل ايه بقى عشان تأمن نفسك؟

كل اللي عليك إنك لو لاحظت منسوب الماية زيادة وقرب يوصل لفلتر الهوا، انك تهدى خالص وتحاول تقيس بالمنطق كدة هل منسوب الماية واصل لفلتر الهوا ولا لأ

في اللحظة دي مش عاوزك تنسى نصايح السواقة في المطر بإنك تقلل سرعتك، لأنك كدة هتكون من ناحية تانية بتحافظ على الشكمان، وده هيحصل بإنك تستقر على سرعة معينة من غير ما تضغط وتشيل رجلك فجأة من على دواسة البنزين، لأن في الفاصل ما بين الدوسة والشدة هيكون في مساحة لحبة ماية يدخلوا وده انت مش محتاجة خالص في اللحظة دي

يبقى بإختصار دلوقتي ..

انت مراقب منسوب الماية + ماشي على سرعة قليلة مستقرة فالشكمان مش واقف

حلو أوي

تفضل ماشي بالعربية ولا تقف؟

بص .. لو الماية ماوصلتش للفلتر وانت عندك حاجة مهمة أو مش قادر تسيب العربية، فماشي كمل وامشي بيها بسرعة قليلة بس لحد ما توصل لأقرب ميكانيكي يبصلك عليها ويطمنك

في حالة الماية لما توصل للفلتر .. انت هنا مضطر  توقف الموتور

وقف الموتور وبلاش تحاول تشغله خالص، ده لو عاوز تحافظ عليه، لأن الماية اللي دخلت العربية ممكن تحرقه لا قدر الله

انت أأمن حاجة توقف كل حاجة في العربية وتحاول تخرج منها.. مش هتنفجر لأ، بس عشان لو المنسوب زاد عن كدة تبقى أمنت نفسك، ولو مازادش بس الماية فضلت لفترة طويلة من غير صرف ماتبقاش متذنب

تعمل ايه طيب في العربية/ السيارة لو غرقت في السيول؟

نصايح لو السيارة غرقت في السيول:

احنا دلوقتي هنتكلم عن العربية الغرقانة في حالتين:

1- في حالة إن الماية وصلت لفلتر الماية واتقطرت بعد كدة

2- ان العربية كانت مركونة أصلا من البداية بس غرقت برضه

الحالتين بقوا في نفس الأزمة، وعندهم نفس المشكلة بعيدا عن اختلاف المكان، المهم بس في حالة رقم (1) مايكونش دوّر العربية والموتور فيه ماية زي ما قولنا فوق، امال تعمل ايه يا برنس؟

هقولك

بعد ما تلاقي ونش ينقلك عربيتك اللي غرقت، انت حاليا مش محتاج غير ميكانيكي شاطر يكشف على العربية، والموضوع ده لازم يكون في أسرع وقت لأسباب كتير، منها:

  • – ماية الأمطار بتعمل تآكل وصدى للأجزاء المعدنية في العربية وماينفعش العربية تبات بيها لأن في فصل الشتاء سرعة جفاف المعادن أقل بكتير والميكانيكي عنده حل لده
  • – وصول الماية للسلندرات والبواجي وغرفة الحرق مش هتعرف تجففها بنفسك
  • – زيوت العربية ممكن تكون اختلطت بالماية وده يقلل من عمر الموتور

الميكانيكي هيعمل ايه لو السيارة غرقت في السيول؟

هيبص على:

1- البطارية

لازم أول حاجه يتأكد منها الميكانيكي هو الماية دخلت للبطارية ولا لأ.. لو دخلت بتبقى ليها خطورتها اللي ممكن توصل إنك زي الشاطر تروح تجيب بطارية جديدة

ولو ماوصلتش، لطيف .. تحمد ربنا

ركن السيارة في الشتاء مشكلة حلها هنا بالتفصيل

2- البوجيهات

البوجيهات يعني غرفة الحرق، يعني الشرارة والنار والعزم، يعني حبة ماية يجوا عليها سواء من الشكمان أو فلتر الهوا، وخلاص شكرا

3- الإطارات

عشان يتأكد من صلاحيتها وإنها ماتشققتش، وضغطها يقدر يستحمل لحد امتى ولا عاوز يتغير

4- هيجفف الماية

ماية يعني صدا .. سهلة؟ ، بالظبط كدة

ماية السيول بقى لو وصلت لأجزاء العربية والأجزاء دي صدت، كفائتها بتقل وبتعطل. ده غير دواخل العربية نفسه من كراسي ودواسات

عشان كدة مهم جدا إنك أول ما تعرف إن العربية دخلها ماية خصوصا ماية سيول يعني مخلوطة بطين وتراب، إنك تروح بيها للميكانيكي ينضف أجزائها ويجفف الماية دي نهائي عشان ماتعملش صدا ولا تآكل في الأجزاء لا قدر الله

5- هيغير الزيت لو محتاج يتغير

لو بتفهم في الزيت، فقياس الزيت من غير ما تحاول تدور العربية هيكون خادع شوية، وانت مش هتحاول أصلا تدورها لما يوصلها ماية مش كدة؟

بالظبط

فلما تروح للميكانيكي ويظبط الدنيا ويدور العربية بأمان، ساعتها هيتأكد إن أصلا الماية وصلت الموتور ولا لأ من غير ما حاجة تتأثر

وكمان بعدها هيظهر الزيت من لونه إن كان اختلط بيه ماية ولا لأ

هل ممكن العربية ترجع تاني كويسة؟

طالما اتبعت الإرشادات السليمة  في المحافظة عليها ووديتها لإختصاصي سيارات عارف هو بيعمل ايه وقام بصيانتها على أكمل وجه، عربيتك بترجع تاني زي ما كانت وأحسن كمان. المهم انك تكون فاهم في كل موقف تتصرف ازاي

وربنا يسلم طريقك يا برنس

خد فكرة كمان عن:

ايه هي العربية الهجينة أو الهايبرد .. وليه المفروض تجربها؟

اعرف 5 طرق تحميك من خطر سخونة العربية وانت سايق

العربية الكهربا .. تاريخها ومميزاتها لو بتفكر تشتري

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *

‫شاهد أيضًا‬

كيف تحدد عمر اطارات السيارة و6 إشارات تدل على ضرورة تغييرها فورا

اطارات السيارة من الأجزاء الهامة جدا، بل تعد الأهم على الإطلاق. فهي الجزء الوحيد في السيار…