2019-10-17

فتيس/ ناقل الحركة DSG .. ايه هو وازاي بيشتغل؟

ناقل الحركة DSG

في بداية ظهور العربيات كانت الإختلافات بسيطة والاختيارات محدودة، ومع التطور والتكنولوجيا اللي غزت كل حاجة في حياتنا، الاختلافات كترت والاختيار بقى أصعب، وده اللي بيواجهه أي حد عاوز يشتري عربية ويلاقي قصاده مثلا عربية بفتيس أو يعني ناقل الحركة DSG وهو مايعرفش عنها حاجة.

بس قبل ما تسيب العربية وتمشي أو تقرر انك مش هتشتريها من مبدأ اللي نعرفه أحسن من اللي مانعرفوش

تعالوا بخطوات بسيطة أعرفكم على ناقل الحركة DSG الـ 7 غيار وانت يا برنس قرر بعدها.

ايه هو الـ DSG؟

الـ DSG هو ناقل حركة أوتوماتيكي، اسمه بالكامل “Direct Shift Gearbox” ، وهو صناعة ألمانية من نوعية الـ Dual Clutch 

شكله ايه ناقل الحركة DSG

أي عربية بيكون ليها دبرياج واحد، وده المسؤول عن نقل الحركة من غيار للتاني، صح كدة؟

الـ DSG بقى عبارة عن ناقل حركة أو فتيس يعني “Double Clutch Gearbox” ، ومكون من 2 دبرياج مش واحد بس، وكل واحد منهم بيسلم التاني

ولو تعرف حاجة عن الـ 6 غيار وعاوز تسأل عن الزيت، فـ لأ، الDSG  الـ 7 غيار مابيكونش زي الـ 6 غيار غرقان زيت، عشان كدة زيته مابيتغيرش فبيوفرلك ميزانية تانية

الـ ناقل الحركة DSGمانيوال ولا اوتوماتيك؟

لا مانيوال بس ولا أوتوماتيك بس، أه .. هو حاجة جامعة الاتنين، وده ليه مميزات كتير، كفاية انك تقدر تستخدم العربية بالطريقة اللي تفضلها في الوقت المناسب

يعني في ناس بتفضل الاتوماتيك في الزحمة عشان ماتتعبش والمانيوال في الطرق السريعة لو حابب تتحكم في عربيتك أكتر، وناس تانية العكس

اقرا عن: أشتري عربية أوتوماتيك ولا عربية مانيوال ؟.. تعالى أقولك الفرق بينهم ايه

بيعمل ايه ناقل الحركة DSG ده بقى ويفرق ايه عن العادي؟

لو انت بتحب العربيات وعندك واحدة ومتابع، أو قاري كويس قبل ما تشتري، هتعرف إن أي عربية العادي بتاعها انها بيكون ليها عدد لفاتRPM معين ماينفعش تعديها وبالتالي سرعة العربية بتقف عند درجة معينة وتثبت عليها

ده غير ان نقل العربية من غيار للتاني بيهنج العربية شوية كدة بين النقلات لحد ما تبدأ تستوعب انت عاوز ايه، وده بيهدر بنزين أو بيزود من استهلاك الوقود

وعشان سرعة العربية و”هتوصل فين في قد ايه!” دلوقتي من الحاجات اللي كلنا بندور عليها في العربيات، بقى في حاجة تحل المشكلة اللي فوق دي واسمها DSG

ازاي؟

تركيبة الـDSG بالـ 2 دبرياج اللي فيها بيخليها:

– ماتهنجش بين النقلات، لأن كل دبرياج منهم بيكون مسؤول عن غيار بالتوالي، يعني عربيتك الـ 7 غيار، هتلاقي ان واحد منهم واخد الأرقام الزوجية والتاني الأرقام الفردية

ناقل الحركة DSG ايه مميزاته؟

لما تاخد أول غيار، بيكون الدبرياج التاني جاهز بتاني غيار، بحيث يتحول من ده لـ ده أتوماتيك من غير ما ياخد أي وقت في التجهيز، وده بيدي عربيتك ميزات أكتر في:

  1.  سرعة أعلى
  2.  نقلات أسرع
  3.  تجميعها أعلى

أنواعه ايه ناقل الحركة DSG!

الـ DSG نوعين، DRY وWet 

طب ايه عيوبه؟

زي ما قولنا النوع الأفضل لينا هنا في مصر وحبة دول كمان، هي الـ Wet، لأننا في مصر زحمة وحر أكتر من البلاد الأوروبية اللي مصنوع فيها الفيتيس ده

 والـ dry مابتقدرش تتخلص من حرارتها صح وفيها عيوب تانية كتير بتأدي لأن القطع بتاعتها بتتغير طول الوقت قبل ميعادها الأصلي، وده عبئ مادي على أصحابه

ده غير إن في بداية نزولها كان فيها عيوب صناعية اضطرت الشركة تسحبها من بعض الدول وتصلح العيب ده .. وده كله أدى لإن سمعة الـ DSG  تبقى وحشة عامة

بس لو هنلخص عيوبها في العربيات هنا في مصر، هنلاقيهم اتنين، عيوب الصناعة لبعض الموديلات، والاستخدام الغلط من اللي بيسوق

يعني مثلا:

– الأوتوماتيك فيها مايستحملش يقعد في الـ 6 ساعات زحمة طريق اللي مابتخلصش عندنا

– وزي أي عربية أوتوماتيك ماينفعش تقطرها لو عطلت منك في الطريق، لازم تجبلها ونش عشان الكلتشات ماتتكسرش وانت بتحركها

فـ خلينا نقول ان الـ DSG زي أي حاجة ليها كتالوج وليها طريقة معينه في السواقة، لو حافظت عليها عربيتك بتبقى زي الفل طول ما انت سايقها، والعكس صحيح طبعا

ازاي اسوق بفتيس DSG؟

الأفضل عامة واللي بيحافظ على عمر الموتور وتروس الفتيس ده لفترة أطول، وحسب نصايح من شركة فولكس فاجن كمان، انك:

  • تستعمل الأوتوماتيك في الطرق الفاضية، ولما تكون في طريق زحمة تنقل عصاية الفتيس لنظام الستيب ترونيك وتتعامل معاها انها مانيوال
  • وعشان ترجعها تاني للأوتوماتيك كل الحكاية هتحرك الفتيس للـ D.

موجود في عربيات ايه؟

هتلاقي الـ DSG موجود في عربيات زي:

فولكس فاجن جيتا وجولف وسيات وأودي وسكودا وعربيات غيرها كتير

خد فكرة كمان عن:

ايه هي العربية الهجينة أو الهايبرد .. وليه المفروض تجربها؟

ماهو الفرق بين المحرك العادي والمحرك التربو

ايه هي ترموستات الكوعة؟ وتسيبها في العربية ولا تشيلها زي الميكانيكي ما قالك!

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *

‫شاهد أيضًا‬

كيف تحدد عمر اطارات السيارة و6 إشارات تدل على ضرورة تغييرها فورا

اطارات السيارة من الأجزاء الهامة جدا، بل تعد الأهم على الإطلاق. فهي الجزء الوحيد في السيار…