2019-10-17

اعرف كل حاجة عن فتيس الـ CVT?

فتيس الـ CVT

فتيس الـ CVT  واللي اسمه من غير اختصارات “Continuously variable transmission“، اللي هو بالعربي كدة “ناقل الحركة والتعشيق المستمر”، مش حاجة جديدة خالص، لكن ناس كتير ماتعرفوش أو ماتعرفش تاريخه، وهنا هنتكلم عنه بالتفصيل:

  • – تاريخه
  • – بيتكون من ايه
  • – بيشتغل ازاي
  • – مميزاته
  • – عيوبه
  • – موجود في عربيات اية

تاريخ فتيس الـ CVT:

فكرة فتيس الـ CVT موجودة من وقت الرسام العالمي ليوناردو دفنشي، وأول استخدام حقيقي ليه كان في 1910 على الدراجات النارية.

بعدها بحوالي سنتين، شركة بريطانية أخدت الفكرة وطورتها شوية، لحد ما ظهر في أول عربية في 1923

أديل دودج المالك الأصلي لماركة دودج المعروفة، أخد الفتيس ده في 1935 وطوره أكتر، بس لأن الأدوات وقتها ماكنتش متنوعة زي دلوقتي، حجم الفتيس كان كبير وتقيل فمانفعش أوي والناس ماعرفتش تستقبله ازاي، بس رغم كدة، شركة فولفو استخدمته لأول مرة في عربيتها فولفو 340 من سنة 1958، ومن وقتها وهو من ايد لايد ومن شركة لشركة لحد ما وصل لحجمه الحالي المناسب جدا للعربيات وأثبت وجوده كـ فتيس وسط الأنواع الكتير الموجودة

يفرق ايه فتيس الـ CVT؟

نقدر نقول ببساطة إن الفتيس، أو ناقل الحركة العادي بيكون فيه تروس، الـ CVT  مفيهوش. وعشان تعرف تفاضل بين الاتنين، لازم تعرف الـ CVT بيتكون من ايه الأول

اقرا عن: أهم أسباب زيادة استهلاك البنزين في عربيتك

 الـ CVT بيتكون من ايه؟

مش عارف، بس أول حاجة لازم نقولها تأكيد يعني انه مفيهوش تروس، لأن دي أهم حاجة ممكن تتقال في الـ CVT

أما بقى بيتكون من ايه، فتعالى يا سيدي نشوف مع بعض:

  • – بكرتين: كل بكرة فيهم عبارة عن مخروط متغير القطر، والاتنين بيقابلوا بعض
  • – سير مطاط أو معدن: السير ده هو اللي بيربط البكرتين ببعض، وهو عبارة عن حلقات كتير

مصنوع من المطاط أو المعدن اللي المفروض يستحمل الحركة بين البكرات عشان يتحمل الاحتكاك اللي هينتج من حركتهم طول مدة القيادة، وكمان يقدر يتحمل الزيت

بيشتغل ازاي فتيس الـ CVT؟

انت عارف طبعا نظام التروس اللي في المحرك العادي، واللي على أساسة بتتنقل بين الغيار الأول للتاني للتالت لـ أخر سرعات عربتيك

انت عارف التروس دي بتحرك العربية ازاي؟

هقولك

في ترس بيكون واصل بعجل العربية، الترس ده بيحرك العجل بناءا على الترس اللي واصل بالموتور، وعلى أساس عدد لفات الموتور اللي هي بتتحسب بالـ RPM اللي ماينفعش تحت أي ظرف من الظروف نزودها لأنها هتأثر على عمر الموتور وهتهلكه، بيتحسب سرعة العجل

ومن هنا جيه الاحتياج لعامل خارجي يزود سرعة العربية من غير ما نزود عدد لفات الموتور

ودا فيديو كويس جدا بيوضح ازاي دا دا بيحصل

طب الـ CVT بقى بيعمل ايه زيادة؟

الـ CVT زي ما قولنا مفيهوش تروس، بس فيه تدرج في تغيير قطر الاسطوانتين اللي بيتكون منهم بناءا على ال RPM.

ازاي؟

لو بتاخد بالك في الموتور العادي المانيوال ده، لما بتنقل من غيار لغيار بيحصل ايه؟، بتسمع صوت النقلة بودنك ولفة الـ RPM بتنزل قصادك كدة وتطلع تاني، صح؟

دي كانت المشكلة اللي الـ CVT حلها بموضوع البكرتين دول. هتلاقي إن بكرة من الاتنين واصلة بالموتور، بحيث انها تاخد قوة من لفته، والبكرة التانية بتكون واصلة بالعجل، عشان تحركه بالقوة اللي خارجة من لفات الموتور دي

التركاية كلها هنا بقى، إن البكرة اللي ماسكة في الموتور وهي بتحرك السير اللي بيحرك البكرة اللي واصلة بالعجل، كل ما كان قطر الحركة في البكرة اللي واصلة بالموتور أكبر، كل ما كانت البكرة الواصلة بالعجلات أصغر وبالتالي سرعة أكبر، والعكس

لما السير بيلف على قطر أصغر في البكرة الواصلة بالموتور، بتكون البكرة الواصلة بالعجلات أكبر، فالسرعة بتقل، لية؟

لأن عدد اللفات في القطر الأقل من البكرات بيساوي عدد أقل من لفات في القطر الأكبر من البكرة المقابلة ليها، وكدة بتقدر تتحكم في سرعة العربية

وهنا بقى ممكن نتنقل للمميزات علطول…

مميزات فتيس الـ CVT:

لو قارنا بين الـ CVT والجير بوكس العادي، هنلاقي إن الـ CVT يفرق عنه في:

  • – انك ما بتسمعش صوت نقل ما بين الغيارات
  • – في ان سرعتك مابتقلش، بالعكس، بتزيد بكل انسيابيه ونعومة من غير ما تزود عدد لفات الموتور فـ الـ RPM  مابيحصلوش أي حاجة
  • – إنك لما بتختار غيار معين يدوي، هو بيتحرك في كل المنطقة بتاعة الغيار ده، مش واقف على نسبه معينه يعني، وبالتالي بيقدر يحكم انت محتاج تتحرك بأنهي سرعة بالعربية
  •  – موفر للبنزين وبيحسن كفائته وكفاءة موتور العربية وعمره الإفتراضي
  • – على عكس ظهوره في البداية بوزن تقيل جدا، الفتيس بقى خفيف جدا في العربية

عيوبه:

– فيه 2 فلتر، منهم فلتر فيه كولر الزيت بيعدي فوقه علشان يقلل من سخونيته، عدم تغيير الزيت ده أو صيانة الفلتر وتغييره كل فترة هيسبب في انه يتسد، ودي حاجة مش لطيفة

– مع دوسة البنزين أكتر من مرة في نفس الثانية مع تعشيق الفتيس أكتر من مرة بيحصل صوت عالي

وحل المشكلة دي انك ماتدوسش بنزين اكتر من ورا بعض، اعرف انت عاوز تزود سرعتك قد ايه ودوسة واحدة بس والعربية هتفهم والصوت مش هيطلع

ايه أنواع العربيات الموجود فيها؟

فتيس الـ CVT موجود في ماركات من العربيات دي:

الدودج

الفولفو

البي ام دبليو

هوندا

جنرال موتورز

هوندا

تويتا

وانواع كتير من العربيات الصيني زي ال “جاك”


خد فكرة كمان عن:

ايه هي أهم وسائل السلامة والأمان اللي لازم تلاقيها في العربية اللي هتشتريها؟

سلانسيه .. يعني ايه سلانسيه

العربية الكهربا .. تاريخها ومميزاتها لو بتفكر تشتري

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *

‫شاهد أيضًا‬

كيف تحدد عمر اطارات السيارة و6 إشارات تدل على ضرورة تغييرها فورا

اطارات السيارة من الأجزاء الهامة جدا، بل تعد الأهم على الإطلاق. فهي الجزء الوحيد في السيار…