2019-10-02

ايه هي أهم وسائل السلامة والأمان اللي لازم تلاقيها في العربية اللي هتشتريها؟

السلامة والأمان في العربية

أول حاجة لازم تتأكد منها وانت بتشتري عربية جديدة، هي وسائل السلامة والأمان في العربية دي، لأن زي ما العربيات بتتطور، وسائل أمانها كمان بيتطور، وانت تستاهل ان عربيتك توفرلك ده

ولأن في ناس كتير مابتبقاش مهتمة أوي بالحتة دي زي اهتمامهم بشكل العربية وماركتها، في منهم ناس مش عارفة ايه هي الوسائل دي أصلا، وتبص عليها ازاي!

عشان كدة جبنالكم أهم وسائل السلامة والأمان اللي المفروض تشيك عليها في العربية اللي بتشتريها جديد

في البداية بس لازم تعرف إن وسائل السلامة والأمان في أي عربية بيتقسموا لجزئين

جزء بيحميك من خطر وقوع حادثة، والتاني عشان لو لاقدر الله وقعت الحادثة مايحصلش ليك أضرار خطيرة

تعالى نتكلم أول حاجة عن:

وسائل السلامة والأمان في العربية اللي بتمنع وقوع الحادثة:

  • المرآيات

مرايات السيارة Car mirrors

أ ب عربية، يعني مرايات، وكل المرايات مش الجانبية بس، كمان المراية اللي بتكشف الجزء الخلفي من العربية مهمة جدا

لأن عربية من غير مرايات هي عربية ماشية في ملكوت لوحدها، يلا نفسي ياباا وانا ومن بعدي الطوفان

طيب انت لو راضي وشايف نفسك نمس سواقة والموضوع مش فارق معاك، ماسألتش نفسك مثلا ايه اللي هيحصل لو:

عربية جاية من وراك وعاوزة تعديك!

عربية هتخبطك مثلا!

اللي وراك داخل يمين وانت مش شايفة فمابتوسعلوش؟

طب انت، كـ صاحب عربية مافيهاش مرايات، ازاي بتحدد مواقع العربيات حواليك فتقدر تتحرك براحتك؟ .. إذا كان في نقط عمياء المرايا مابتقدرش تجيبهم

الموضوع مهم جدا فعلا فـ خلوا بالكم

 

  • نظام الـ ABS

خلينا نقول إنك بتشتري عربية حديثة، معلش لأن الـ ABS واللي بالعربي اسمه نظام مانع الإنغلاق مابيكونش موجود غير في العربيات الحديثة

وانت داخل بقى ع الراجل وقاعدين تتكلموا في الأمان والسلامة وكدة، أسأله ايه أخبار نظام الـ ABS في العربية!

لو العربية مستعملة اعرف منه تجربته والنظام شغال كويس ولا لأ

ولو جديدة، شيك بنفسك ع العربية ويا حبذا لو جربتها

ليه بقى ده مهم؟

في دعاء كدة تملي أمهاتنا تقوله واحنا نازلين، وهو “ربنا يكفيك شر الطريق”، عمركش سألت نفسك ليه؟

لأنك يا برنس مهما كنت عبقري سواقة، في حد جنبك فجأة هيفاجئك بتصرف مش مفهوم، ومش عاوزين نفهمه، بس التصرف ده يا هيجيب أجلك بعد الشر يعني، يا هتعرف تعديه

وفي معظم الوقت هتكون محتاج فرامل

نظام الـ ABS  ده بيساعدك وانت بتدوس فرامل ان العربية ماتجريش منك ع الأسفلت

لأن الفرمله فجأة بتخلي العربية مش فاهمه تعمل ايه، وسرعتها لسه فيها رغم ان العجلات وقفت خلاص، فهتاخدك في أي حته لحد ما تسيطر على نفسها

الـ ABS بقى بيهديها ومابيخليهاش تقفل أوي مرة واحدة، عشان كدة اسمه نظام مانع الانغلاق

هو كمان بيمنع قفل العجلات لما بتدوس انت جامد على دواسة الفرامل عشان يخليك تعرف توجه العربية في المكان اللي انت عاوزة وتعرف تتحكم فيها بشكل عام

 

  • نظام AEB (فرامل الطوارئ)

لو عديت كام مرة بتغلط وانت سايق، هيطلع 94% من الغلطات دي انك بتبص في أي مكان غير قدامك ولو  للحظة، واللحظة دي ممكن يحصل فيها بلاوي  ربنا يبعدك عنها

ليه بقولك كدة؟

عشان يا سيدي نظام الـ AEB، وده بيعمل ايه بقى!

بيحذرك، يعني لو مش واخد بالك وفي حد معدي وهتخبطه، بيديك اشارة تحذيرية، ولو ماعملتش حاجة بياخد هو أكشن لوحده كدة ويوقف العربية أوتوماتيك

النظام ده مش موجود في كل العربيات اللي قدامك في الشارع للأسف، بس غالبا موجود في كل الموديلات الجديدة اللي في السوق، وفي حوالي 8% من العربيات عامة

لو عرفت يا برنس يكون في عربيتك فـ انت الكسبان.

  • نظام الرؤية الليللية

وده زي ما هو واضح من اسمه، يعني يخليك تشوف بالليل. وده  مش مفيد أوي يعني لو انت بتسوق في أوقات نهارية أو مش بالليل أوي عامة

بس لو بتسوق بالليل أوي قبل الفجر كدة أو في أماكن مفيهاش إضاءات كتير في طرق السفر والطرق المختصرة المش مأهولة بسكان، الخاصية دي هتفيدك جدا في انك تشوف أي حاجة متحركة تعدي قدامك ماتتشافش بالعين المجردة.

ده طبعا بجانب الإضاءات التلاتة باختلاف درجاتهم اللي بتستخدمهم كل واحدة في الوقت اللي محتاجها فيه

 

  • كاميرا الرؤية الخلفية

الكاميرا دي حتى لو مش في العربية انت تقدر تشتريها، وهتفيدك جدا في الركنات ومراقبة الطريق. اللي بيميز الكاميرات دي انها بتكون بتقنية الـ 180 درجة فبتديلك رؤية كاملة

_____

 

وسائل السلامة والأمان في العربية وقت وقوع الحادثة:

 

  •  حزام الأمان

حزام الأمان أول ما تم اختراعه كان بغرض تثبيت الناس اللي بتسوق طيارات بشراع، وبعدين فضل يتطور لحد ما دخل كمان في العربيات في حوالي 1949م

حزام الأمان

 

لحد ما وصلنا لأخر حزام أمان بـ 3 نقط اللي عمله نيلس بوهلين في 1959م مع شركة فولفو، واللي لسه بيتم استخدامه لحد النهاردة .. طبعا مع التحديثات

(صورة نيلس بوهلين لابس حزام الأمان اللي اخترعه)

هل ده معمول عشان يضايقك؟

أو انت مابتسوقش كويس فبنحاوطك زي الطفل الصغير؟

هل هو مجرد حاجة قانونية لازم تطبقها عشان ماتتاخدتش غرامة؟

دي كلها أسأله ممكن ناس كتير تسألها، بس خلينا نركز في حاجة

حزام الأمان كل غرضة في الحياة انه يثبتك مكانك أه، بس لازم تعرف إن ده رغم انه مربك لبعض الناس اللي مابيحبوش يتربطوا في مكان لفترة طويلة، إلا انه أمان 4 مرات أكتر من عدم ربطه للي بيسوق

لدرجة ان الكنبة وراها خلوا ليها هي كمان أحزمة أمان، فبقت العربية فيها 4 أحزمة أمان لحماية الركاب كمان

بيعمل ايه حزام الأمان كوسيلة من وسائل السلامة والامان في العربية؟

– بيحمي أكتر مناطق معرضة للخطر في جسمك، زي عمودك الفقري، والراس

– بيحميك من الاندفاع بشكل لا إرادي بره العربية حسب قوة الحادثة

– مش هيخليك تخبط في حد جنبك، ده طبعا على أساس انك حاطط حزام الأمان انت واللي جنبك

– مابيسمحش لجسمك يوصل للسقف

– بيحمي الأطفال اللي عندهم فرط حركة

 

  •  الأكياس الهوائية

وانت بتشتري العربية لازم تتأكد إن فيها أكياس هوائية، ولو مش عارفها، هممم .. هقولك

عارف في الأفلام الأجنبي، أول العربية اللي البطل بيسوقها ما تتخبط في أي حاجة تقوم طالعة بلونة من الطارة قدامه وتضرب في وشة دي؟

أهي دي أسمها أكياس هوائية

أكياس هوائية في السيارة

ودي أماكن وجودها في العربية عشان يبقى عندك فكرة:

airbags

والأكياس الهوائية دي هي اللي بتكمل شغلانة حزام الأمان، ازاي؟

أقولك

 صدمة العربية في الجسم اللي خبطت فيه كل ما كان قوي وثابت، كل ما خلاك غصب عنك جسمك يتحرك لا إرادي لقدام، لأنك وانت سايق جسمك بياخد نفس سرعة العربية، ولما العربية بتقف فجأة جسمك مابيترجمش

وهنا بيجي دور الكيس الهوائي في انه يحاول يثبتك أكتر من غير ما تتخبط في أجزاء العربية، وبتفضل منفوخة عشان ماتردش تاني ويحصلك حاجة

وفي النهاية تلاقي نفسك محشور بين الحزام والكيس الهوائي ده وده طبعا أمان أكتر بكتير من اللي ممكن يجي في خيالك

الإير باج بيبقى مشكلة في حالة واحدة بس، انك تكون مش رابط حزام الأمان أصلا، فـ في وقت الحادثة لا قدر الله بيكون مشكلة أكتر من انه حل

لأن حضرتك لو لابس الحزام، الموضوع بيبقى بسيط إن شاء الله وكل حاجة هتشتغل شغلها

بس لو مش لابس الحزام، ماحدش في الدنيا يقدر يقولك الاير باج هتوديك فين

خصوصا انها بتضرب فجأة، وده في وقت الاصطدام مش مطلوب إطلاقا وممكن بعد الشر يكسر رقبتك حرفيا، يعني هيزود الطين بلة بجرة قلم عادي جدا

طب لو بتشتري عربية مستعملة؟

 لو بتشتري عربية مستعملة ولسه مادفعتش تمنها وعرفت إن مفيهاش أكياس هوائية أو اير باجس

لو صاحبها مالتزمش يركبهالك ويسلمك العربية بيها أو ماعرفتش تخصم من الفلوس اللي مطلوبة تمن الاير باج اللي هتركبه على حسابك! .. يبقى بلاش تشتري أحسن

إلا لو العربية لقطة وانت مش فارق معاك تدفع فلوس زيادة بعدين

بس لو مش فارق معاك الفلوس طب ما تجيب واحدة جديدة موديل جديد وخلاص!!!

بص أيا كان يعني، المهم ماتركبش العربية من غير الاير باجس، ودي أماكنها

 

_______

خد فكرة كمان عن:

تتعامل ازاي مع انفجار إطار السيارة أو كاوتش العربية على الطريق؟

ليه الرادار بيقفشك؟ .. 5 حاجات عن الرادار لازم تعرفهم

ايه هي ترموستات الكوعة؟ وتسيبها في العربية ولا تشيلها زي الميكانيكي ما قالك!

اعرف 5 طرق تحميك من خطر سخونة العربية وانت سايق

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *

‫شاهد أيضًا‬

كيف تحدد عمر اطارات السيارة و6 إشارات تدل على ضرورة تغييرها فورا

اطارات السيارة من الأجزاء الهامة جدا، بل تعد الأهم على الإطلاق. فهي الجزء الوحيد في السيار…