2019-09-29

امتحان رخصة السواقة .. اعرف شكل الامتحان وايه أسباب السقوط؟

سبب السقوط في امتحان السواقة

امتحان رخصة السواقة مش بعبع بس ليه حبة حاجات كدة، منها انك تبقى معدي 18 سنة

عشان كدة أي حد لسه ماوصلش للسن القانوني بيكون حلمه الشاغل انه يسوق في أي كمين من غير ما حد يقوله رخصك، فبيضطر يسمع كلام بابا ويتلهي لحد ما يطلعها.

وبيطلعها؟

لأ بيتلهي بس.

وأقصد هنا بيتلهي مش سخرية لا سمح الله، بس تلاقيه مش مركز كدة ولا مدي الموضوع أهميته، فيدخل الامتحان ويخرج وهو راسب، ويقولك أول مرة أسقط في حياتي ويارب ليه بابا مش وزير المواصلات.

مع ان الموضوع أبسط من كدة، ومش بالشكل اللي انت فاكرة لأ.

انت بس محتاج تعرف كام حاجة عن امتحان رخصة السواقة .. زي:

1- الامتحان شكله ايه!

2- تتعلم سواقة فين؟

3- ايه الأخطاء اللي المفروض ماتقعش  فيها

ده طبعا على اعتبار انك فاهم أنواع رخص العربيات وشروطها، زي ان السن مايقلش عن 18 سنة، ولو مش عارف ممكن تقرا المقال ده:

رخصة القيادة (1-2) ايه أنواعها وازاي تطلعها في مصر

يلا بقى نبدأ مع أول حاجة …

1- امتحان الحصول على رخصة السواقة .. شكله ايه؟

امتحان السواقة اللي هتاخد بيه أول رخصة قيادة في حياتك، ماينفعش تروحه وانت شايفه حاجة بسيطة ومش مستاهلة مذاكرة

ماهو مش ثانوية عامة أه انا عارف، بس امتحان يا معلم والرسوب فيه حوالي 3 شهور عشان تدخله تاني

طيب الامتحان عبارة عن ايه؟

عن جزئين:

جزء نظري

 وده تذاكره عن طريق مذاكرة كل اشارات المرور الموجودة في مصر، جوجل سيرش ماخلاش اسأله وهتلاقيهم كلهم، ولو غلبت أوي هتلاقي مدارس سواقة كتير ممكن تبقى تسألهم عن مادة علمية فيها الكلام ده عشان تقدر تذاكره

على فكرة الاشارات دي مش بس مهمة للامتحان، هي مهمة عامة، وهو مش رخامة وهنمتحن في دي كمان! .. خالص

الموضوع ان ده بيثبت انك فاهم يعني ايه شارع اتجاه واحد وان في علامة عشان تقف وعلامة ممنوع الدخول و… الخ، فأمان يعني يا برنس ماتستهترش

لأن السقوط في النظري على أخر كلام سمعناه بيخليك تقعد 3 شهور عشان تروح تمتحن تاني، فخلي بالك الله يكرمك

جزء عملي

وده بيبقى عبارة عن امتحان عملي في انك بتعرف تسوق ولا لأ

والسواقة هنا يعني بتعرف تمشي في حارات ضيقه؟

بتعرف تتعامل مع الاشارات اللي لسه ممتحنها نظري بس بشكل عملي بقى؟

يعني لو لاقيت اشاراة حمرا هتقف ولا تكسرها؟

وممنوع الدخول والكلام ده!

كمان بتعرف تسوق في الشوارع على شكل حرف (اس) مثلا!

بتعرف تركن؟

لو الموضوع صعب أوي، هيطلبوا منك غالبا ترجع بضهرك كمان!

وعلى فكرة .. لو نجحت في النظري وسقطت في العملي، مش هتاخد 3 شهور ولا حاجة، ده ممكن ترجع بعدها بأسبوع أو اتنين تمتحن

بس برضة، يعني حاول تعدي من أول مرة عشان تخلص

2- تتعلم سواقة فين بقى؟

السواقة سهلة، ممكن تتعلمها من باباك على عربيته أو صاحبك على عربيته برضة وده ينفع راجل أو ست.

ولو مالقتوش حد عنده خلق وصبور كدة ممكن أي مدرسة تعليم برضة والموضوع مش هياخد أسبوع.

في ناس بتتكلم عن مدرسة تعليم القيادة التابعة لإدارة المرور، لو عرفت تتعلم فيها يبقى خير وبركة، لو ماعرفتش ووقتك ماسمحش، اتعلم من أي حد ومفيش أي داعي لأي خوف الموضوع بسيط

 

ايه سبب الخوف من السواقة وازاي تتغلب عليه؟

3- ايه الأخطاء اللي ممكن ترتكبها  في امتحان رخصة السواقة تخليك تسقط؟

– فوت اشارة مرورية

زي ماقولنا فوق ان الامتحان عملي بس بيكون فيه نقط نظري تطبقها بقى، زي انك تقف في اشارة مرور او تنفذ اللي مكتوب في علامات مرورية مهمة، وده بيسقطك في الامتحان لأنه مهم جدا لسلامتك وسلامة الناس حواليك

– مابيعرفش يوقفها

مابتبصش قدامك ليه؟ ها! . ليه؟

ماهو ماتبقاش في امتحان السواقة، وتوقع الأقماع وتقول مانجحتش ليه! .. انت اه في مكان ضيق، بس ماتجيش في مكان ضيق وتغلط امال لما تطلع للفضا الواسع هتنيل ايه؟

ماتوقعهمش ولا تخبط في حاجة وانا اضمنلك انك هتنجح

بس لو وقعتهم حط في دماغك ان دي مش أقماع، دول ناس بيعدوا قدامك أو عربيات ماشيه معاك في حارتك أو حارات تانية أو حتى واقفة في حالها حتى

أو اي حاجة متحركة في الشارع لما تسوق ان شاء الله

قولي بقى، لو خبطت حاجة في الشارع كدة انت مبسوط؟ .. والعكس كمان. صدقني ماحدش هيبقى مبسوط

ركز بس والله الامتحان ده عشانك وعشان عمرك مايضعش في “والله ما كانش قصدي”

– مابتبصش في مراياتك

فوق كنت بقولك تبص قدامك، دلوقتي بقولك بص حواليك.. لخبطتك!، خلاص ماتروحش الامتحان لحد ما نفهم الموضوع

دلوقتي العربية بسم الله ما شاء الله بيكون فيها مرايات، والمرايات دي بتقولك ايه وراك وحواليك، صح؟

تعالى أقولك هيحصل ايه لو مابصتش في المرايات دي:

لو وقفت فجأة ووراك عربية فالعربية دي فرملت فجأة! .. هتسقط

لو مالفتش في المسار صح وانت بتبص في مراياتك! .. هتسقط

لو رجعت بضهرك غلطت فخبطت في أي حاجة أو ظهر انك مش عارف تتحكم في العربية! .. هتسقط

ثواني بس

لو دخلت حارة محطوط عليها اشارة انها اتجاة واحد وانت كدة ماشي عكسي! .. هتسقط

لو دخلت حارة مش محطوط عليها أي اشارة مرورية بس في عريبة جاية من الناحية التانية وانت اللي داخل غلط قصادها! .. هتسقط

انا مش بحبطك، أبسلوتلي، بس الحاجات دي مهمة جدا نعرفها، لأن الشارع ليه قوانين لازم نلتزم بيها طالما قررنا نخرج نسوق فيه

والرخصة اللي بتطلع بامتحان سهل مش أحسن من امتحانك خالص، لأن الامتحان الصعب هو اللي هيخليك سواق شاطر، وده اللي هيقلل نسبة حوادث الطرق في بلدنا

ملحوظة:

في ناس لما بتدخل الامتحان بتحس بتوتر شديد، ورغم انه مثلا بيكون سواق شاطر وهي بتكون متعلمة كويس أوي وعندها تجارب كويسة جدا، بس بيسقطوا، فنصيحة يعني

خليك هادي كدة وماتتوترش وهتعدي ان شاء الله، الخوف هو اللي بيوترك وبيخليك تعمل خطوة غلط تضيع فرصة هتستنى شوية عشان تقدر تعيدها تاني، فـ ليه؟ الموضوع ما يستاهلش

اهدى، دور العربية، سوق براحتك

ويارب تنجح يا معلم .. ورحلة سعيدة برخصتك الجديدة

_______

 

خد فكرة كمان عن:

أشتري عربية أوتوماتيك ولا عربية مانيوال ؟.. تعالى أقولك الفرق بينهم ايه

رخصة العربية (2-2) ايه أنواعها وازاي تطلعها في مصر

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *

‫شاهد أيضًا‬

كيف تحدد عمر اطارات السيارة و6 إشارات تدل على ضرورة تغييرها فورا

اطارات السيارة من الأجزاء الهامة جدا، بل تعد الأهم على الإطلاق. فهي الجزء الوحيد في السيار…