2019-09-04

اللوحات المعدنية للعربيات بدأت امتى وايه سر الأرقام والحروف اللي عليها؟

اللوحات المعدنية للعربيات في مصر

اللوحات المعدنية للعربيات أو بالمصري كدة لوحة العربية اللي عليها أرقام وحروف، ليها تاريخ زيها زي البوتاجاز كدة

اشمعنى البوتاجاز؟

عشان ليه تاريخ .. سهلة يعني

بس عمرك فكرت شوية مثلا لوحة العربية اللي بتكتب أرقامها عشان تشتكيها لأي سبب من الأسباب، أو رقم عربيتك نفسه اللي الأمين بيكتبه عشان يسجلك مخالفة

امتى اتعمل!

وليه اتعمل!

واتطور ازاي!

وايه أخر حاجة وصلها في مصر!

لو مهتم، طبعا مش هتعرف لوحدك، بس هتعرف لو قريت للآخر….

أولا: ليه اللوحات المعدنية للعربيات دي موجودة أصلا؟

لأن عربية من غير أي تعريف بيقول هي بتاعة مين أو صاحبها نجيبه ازاي، سبب مشاكل وكسر قواعد كتير

فكان في أسئلة منطقية بديهية كتير، وبالمناسبة الأسئلة دي ممكن أي حد يتخيلها، زي:

ايه ده عربية سريعة ومانعرفش عنها حاجة؟

مش معقول العربيات اللي بتعمل ازعاج وبتكسر قوانين الهدوء والسكينة في المنطقة؟

فـ ده جاب وراه الحل الأكثر منطقية اللي جيه في بالك دلوقتي وبال اللي عمله وقتها، وهو:

طب ما يلا نعمل حاجة تخلينا نعرف العربية دي بتاعت مين!

ومن هنا، بدأت الحكاية …

ثانيا بقى: امتى اللوحات المعدنية للعربيات بقى ليها وجود؟

 

أو بمعنى تاني يعني، اللوحات دي بدأت قبل ولا بعد اختراع العربيات؟

بص، يقال ان فرنسا أول بلد عملت فكرة اللوحات دي سنة 1893

وبعدها ألمانيا في 1896

وبعدين بقى في نيويورك في 1901

ولحد الوقت ده غالبا كان كل واحد بيعمل لوحة عربيته بنفسه، وكانت بيتكتب عليها حروف أساميهم الأولى

وكانت بتبقى من الجلد أو الحديد

بس في 1903 بقى، في ولاية ماساشوستس في شمال أمريكا، ظهرت أول لوحة عربية حكومة الولاية نفسها اللي عملاه

 

وكانت رقمها (1) .. واتكتب جنبها أول حروف اسم الولاية، واللي أخدها ودخل بيها التاريخ رجل أعمال اسمه Frederick Tudor

أول لوحة معدنية في أمريكا ... Frederick Tudor
أول لوحة معدنية في أمريكا .. Frederick Tudor

 

مش عاوز أطول عليك، بس من ضمن اللي قريته إن الولاية عملت كده لأنها كانت محتاجة فلوس تظبط بيها الطرق

وفي فترة قليلة جدا، كام شهر يعتبر، قدرت الدولة تجمع حوالي 17 ألف دولار ودخلوا في خزينة الدولة.

ندخل على مصر بقى؟

يلا بينا …

مين الجهه المختصة بصنع اللوحات المعدنية للعربيات في مصر؟

مصنع سك اللوحات المعدنية التابع لمصلحة سك العملة التابع لوزارة المالية هو المسؤول

وغالبا المفروض أقول انه المسؤول الوحيد لأنه المصنع الوحيد من نوعه في مصر

ايه شكل اللوحات اللي بتتطبع؟

 

اللوحات المعدنية للسيارات قديما
اللوحات المعدنية للسيارات قديما

شكل اللوحات المعدنية للعربيات في مصر اتغير أكتر من مرة، ما بين الخمسينات والتمانينات والألفينات

لحد ما وصلنا لنوع لوحات الكترونية بتسلمها إدارة المرور لأصحاب العربيات بداية من 2010

اللوحات دي بتتكون من حروف وأرقام بدل القديمة اللي كانت أرقام بس

 

اقرا برضه عن: رخصة العربية (2-2) ايه أنواعها وازاي تطلعها في مصر

بس هما بيستخدموا كل الحروف والأرقام؟

لأ …

حروف وأرقام ممنوع استخدامها في اللوحات المعدنية للعربيات

بعد دراسات كتير، قررت الإدارة العامة للمرور تستبعد 11 حرف من حروف اللغة العربية الـ 28، وهما:

(ث – ح – خ – ز – ذ- ش – ض – ظ – غ – ك – ت)

ليه؟

لأنها ممكن تكوّن كلمات خادشة للحياء ماينفعش تكون موجودة في الشوارع وبتتشاف بشكل يومي في العلن

بس رغم ان ده احتياط جميل، في ناس حظها الوحش بيوقعها في لوحات بكلمات تانية، لو اعتبرناها شتيمة فهي على خفيف

زي: (عجل – هبل – عرا – ..)، وكلها بتتكون من الحروف المتاحة.

فمعلش بقى لو جت فيك، ده أهون كتير م اللي كان ممكن يحصل بالحروف التانية والله

طب بذمتك لو خيروك بين عرا مثلا و …!، كل واشكر يا برنس والله دي دنيا يعني ماتاتخدهاش جد كدة

طيب في أرقام ممنوعة ليه؟

هو مش أرقام كتير، ده رقم (0)

وممنوع لأنه بطريقة ما في ناس بتتحايل على الرقم ده وتحوله لرقم تاني عشان المخالفة ماتجيش فيهم ويلبسوا

فكدة بيضمنوا لنفسهم عدد غلطات لا نهائي والمسكين اللي يغيروا رقمهم ليه يلبس هو

ما أه حضرتك، نفس الحروف بيطلع عليها عدد لا نهائي من الأرقام، فلو بـ (0) كمان الموضوع كان هيبقى مدبحة

فنقول الحمد لله انهم فكروا في كدة

خليني أأكد عليك بس، الحروف مابتتكررش في نفس اللوحة، ولا الأرقام

بس نفس الحروف ممكن يتعمل منها 504 لوحة

لأ انا مش حاسبها غلط، شيل انت بس الصفر من الحسبة وانت تتأكد

طيب الأرقام ولا الحروف دي بتكون في كل المحافظات زي بعض؟

لأ يا برنس

تعالى بقى أقولك اللي فيها…

اعرف المحافظة من حروف اللوحة المعدنية:

لو اللوحة فيها أي حرفين و4 أرقام .. تبقى جيزة

لو اللوحة فيها أي 3 حروف و3 أرقام .. تبقى القاهرة

لو اللوحة فيها 3 حروف و4 أرقام .. تبقى محافظة غير القاهرة والجيزة

وأول حرف بيدل على المحافظة دي، زي:

س .. اسكندرية

د .. دقهلية

م .. منوفية

ب .. بحيرة

ر .. شرقية

ع .. غريبة

ق .. قليوبية

ف .. فيوم

و .. بني سويف

ن .. منيا

هـ .. سوهاج

ى .. أسيوط

محافظات وجه قبلي بقى

هي بتبدأ بحرف (ص) وبعده حرف تاني يعبر عن المحافظة دي

زي:

ص أ .. قنا

ص ق .. الأقصر

يفضل ايه عندنا!

محافظات القناة والبحر الأحمر وجنوب سينا

ومحاظفات الوادي الجديد ومطروح

الأول: محافظات القناة والبحر الأحمر وجنوب سينا

ودول بيبدأوا كلهم بحرف الـ (ط) وبعد كدة حرف المحافظة

زي:

ط س .. السويس

ط ص .. اسماعيلية

ط ع .. بورسعيد

ط ج .. جنوب سيناء

ط ر .. البحر الأحمر

أخر حاجة بقى:

محافظات الوادي الجديد ومطروح

ودول بيبدأوا بحرف الـ (ج) وبعدين حرف يدل على المحافظة

ج ب .. الوادي الجديد

ج هـ .. مطروح

ـــ

حلو أوي الكلام ده.

بس زمان كانوا بيكتبوا على لوحة العربية هي ايه! .. يعني اجره ولا ملاكي وكدة

دلوقتي مابقاش مكتوب

ماشي انا معاك ان دلوقتي مابقاش مكتوب، بس بقى موجود حاجات تخلي حتى اللي مابيعرفش يقرا يآمن على نفسه

ألوان اللوحات المعدنية ودلالتها:

مع بداية تفعيل تحويل التاكسي في القاهرة، من أبيض واسود لأبيض بس

كانت الناس “خصوصا البنات” مابتبقاش عارفة العربية البيضا اللي جاية دي هي تاكسي ولا خاصة، فتشاور وخلاص

ولأن العربية البيضا مش ديما تاكسي، هي كمان ممكن تبقى ملاكي، وملاكي صاحبها مش ديما غرضة شريف

ده خلى عدد مش قليل يتعرض لمصايب، زي السرقة والخطف وما إلى ذلك

وده حصل لأن الناس ماكنتش متعودة على الألوان بتاعت اللوحات الجديدة

اللي هي:

ألوان اللوحات المعدنية ودلالتها
ألوان اللوحات المعدنية ودلالتها

 

الأزرق .. شرطة

اللبني/ السماوي .. ملاكي

البرتقاني .. أجرة (تاكسي – ميكروباص – …)

الأحمر .. النقل والجرارات

البني .. تراخيص مؤقتة

الأصفر .. ترخيص جمركي

الأسود .. سيارة تحت الطلب

الأخضر .. ترخيص دبلوماسي

الرمادي .. ترخيص حكومي (زي أتوبيسات النقل العام)

البيج .. الليموزين والأتوبيسات السياحية

ايه الأرقام المميزة اللي في اللوحات المعدنية؟

طبعا أي حروف بتكوّن كلمة مفهومة وليها معنى حلو، بتكون مميزة، زي:

بطل

جدع

رضا

عال

عسل

وهكذا …

في مميز عن كدة؟

طبعا

لو الكلمة كونت مع الرقم جملة كاملة، زي:

مصر 1

أهم 1

رقم 1

قلب 1

أو بأرقام متسلسلة جنب بعض زي

أنا 123

ــــــــ

على فكرة، بيحصل مزادات كتير على الحروف والأرقام المميزة، ممكن تبقى تتابع أخبار المرور والمزادات الحكومية اللي بتحصل تبع المرور.

المزادات دي بتحصل من زمان، من أول يوم ظهور لـ اللوحات المعدنية دي، بس وقتها كان بيتعمل على شكل ورق يناصيب

والدليل على ان جوه كل واحد فينا نازع اننا نبقى مميزين حتى لو برقم عربية

كان بيشتري ورق اليناصيب ده أكتر من 5000 شخص عشان يفوزوا بالأرقام المميزة اللي موجودة

بس في العموم لو هنتكلم عن الرقم المميز فـ رقم (1) ده لو دخل على أي لوحة بيكون مميز، فلو سمعت انه اتباع بملايين ماتتخضش، لأن ده نوع من أنواع الاستثمار للدولة

ده غير ان قانون الحياة نفسه بيقول إن اللي عاوز يبقى مميز يدفع تمن تميزه ده، مش كدة برضه!

خد فكرة كمان عن:

سلانسيه .. يعني ايه سلانسيه؟

رخصة القيادة (1-2) ايه أنواعها وازاي تطلعها في مصر

أشهر 17 سبب لـ المخالفات وسحب الرخص في مصر

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *

‫شاهد أيضًا‬

كيف تحدد عمر اطارات السيارة و6 إشارات تدل على ضرورة تغييرها فورا

اطارات السيارة من الأجزاء الهامة جدا، بل تعد الأهم على الإطلاق. فهي الجزء الوحيد في السيار…