2019-08-29

سلانسيه .. يعني ايه سلانسيه

يعني ايه سلانسيه والعربية على السلانسيه وده بيكون مفيد امتى!

سلانسيه

سلانسيه لما اختارناه كـ اسم للموقع، ماجاش صدفة خالص، بالعكس، الأسماء كتير جدا وكلها بتعبر عن العربيات

زي كبوت وجنوط وسكة ووش سلندر … إلخ

بس سلانسيه معناه هو أكتر حاجة بتعبر عن المحتوى اللي بنقدمه هنا

اللي هو ايه؟

اقرا مقالين تلاتة وتعالى كمل:

كاوتش العربية أو إطار السيارة .. كل حاجة عنه وبالتفصيل

أهم أسباب زيادة استهلاك البنزين في عربيتك

قريت خلاص؟! … طب تعالى نعرف بقى

سلانسيه سلانسيه .. يعني ايه سلانسيه بالتفصيل؟ 

سلانسيه يعني واحدة واحدة، ع الهادي كدة يا برنس

وده بينطبق ع الموقع في مقالاتنا اللي زي دي “اللي بتقراها يعني” وزي الأمثلة اللي حاطينها فوق

لو لاحظت هتلاقينا بنقدم المعلومة واحدة واحدة وع الهادي وبطريقة بسيطة

سلانسيه كمان ممكن تستخدمه في قعدة لما تلاقي حد عصبي أو واخد الموضوع على قلبه أوي

فتقوله: براحه وع السلانسيه كدة وافهم، الموضوع ان ….. بلا بلا بلا

جيه منين لفظ سلانسيه؟

السلانسيه مصطلح جاي من العربيات، لو دورت على معناه الحرفي

هتلاقي على موقع ويكبيديا اسمه “سرعة الحمل الخالي”

ولو عاوز المعنى المقابل ليه بالانجليزي، وأرجوك سيب الشاكيت، فـ هو  IDLE SPEED

امتى العربية بتكون سلانسيه ؟

عارف انت الفترة اللي بتدور فيها العربية من غير ما تدوس بنزين وتفضل واقف؟ هو ده السلانسيه

ساعات بتمشي!

أه، بس لو هتمشي بيها، بتبقى أبطئ سرعة ممكن العربية تمشي بيها

عارف انت الشخص اللي بيبقى بيتكلم مع حد واقف في الشارع وعربيته ماشية لوحدها!

أو مثلا بيبقى ماشي بالراحة جدا وفجأة حد يجي من الكشك اللي جنبه معاه أكياس شيبسي فالعربية تشد فجأة!

طب الراجل اللي بيعاكس واحدة ماشيه ع الرصيف وموقف الشارع وراه!

كل دول حالات العربية فيه بتكون ماشية ع السلانسيه

أعمله ازاي المشي ع السلانسيه ده؟

زي ما احنا عارفين ان العربيات نوعين

مانيوال واوتوماتيك

العربية المانيوال

لما تمشي على السلانسيه في عربية مانيوال، معناه انك مدورها ورجلك ع الدبرياج

وبتشيل رجلك واحدة واحدة من غير ما تدوس بنزين خالص

فتلاقي العربية بتمشي تاتا تاتا

أما العربيات الأتوماتيك بقى

فـ دي لما بتمشي ع السلانسيه بتكون يدوب مدور العربية ودايس فرامل

تدي غيار D وتشيل رجلك من ع الفرامل، هتلاقيها ماشية لوحدها

وأه من غير بنزين

طب ازاي؟

الخبرة بتقول إن سرعة الـ RPM ع السلانسية بتكون في السلانسيه تحت الـ 1

ايه الـ RPM ده الأول؟

الـ RPM ده اختصار كلمة Revolution Per Minute، يعني دورة الموتور في الدقيقة

في أي عربية حديثة هتلاقيه موجود قصادك في شاشة

ناس بتقول عنه انه جهاز أو عداد، لكن الـ RPM هو وحدة قياس الدورات في عربيتك

يعني بيعد دورات عمود الكرنك في الموتور بيلف كام لفة في الدقيقة

الـ RPM بيعد من 0 لحد 7 أو 8، اللي هو 7000 أو 8000

في السلانسيه بقى مابيوصلش لـ 1، يعني 1000

هو لو زاد أوي عمره ما يعدي 900

امتى الـ RPM بيعلى؟

كل ما تدوس بنزين وتحمل ع الموتور أكتر، عداد الـ RPM بيزيد

بس خلي بالك انه لو وصل لـ 5000 فيما فوق، دي مشكلة ولازم تخلي ميكانيكي يشوف العربية

لأنه لو لاقدر الله وصل للـ 7 ولا 8، معنى كدة ان الموتور بتاع العربية بيتحرق

طيب امتى بيقل؟

طالما الـ RPM  أقل من 2، أو 2000 يعني

كدة الرقم قليل

وضعية سلانسيه دي بتكون مفيد امتى:

غير الحالات اللي قولناها فوقها، في حالة مهمة جدا وبيكون السلانسيه فيها أفضل حل للعربية

وهو انك تكون ماشي في طريق متكسر أو مش مظبوط عامة

في الحالة دي أيا كان طول الطريق، ياريت تأخده كله سلانسيه عشان عربيتك ماتتعورش

كمان لما تكون بتركن العربية، ده مهم لحاجتين

أول حاجة: انك ماتخبطش في عربية من اللي راكنين

تاني حاجة: انك تدي فرصة لمروحة العربية تقف قبل ما تبطل العربية خالص

هل ده معناه ان سلانسيه وضع مفيد طول الوقت؟

لأ، لأنه بيحمل على موتور العربية بزيادة، فحاول يكون في الضروريات بس

زي ما قولنا في شارع مكسر مثلا

انما لو ماشي ع الرصيف بالعربية عشان تعاكس!

بص قدامك الله يباركلك الطريق واقف والعربية نفسها ممكن تنطق في الوقت ده وتقولك كلام يعجز اللسان عن الرد عليه

سلانسيه سلانسيه وشد الرحال يا بيه

ـــــــــــــــ

أنا عارف انك قريت مقالين فوق

بس خد فكرة كمان عن:

سرقة العربيات .. طريقتين عشان تحافظ على عربيتك من السرقة

أشهر 17 سبب لـ المخالفات وسحب الرخص في مصر

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *

‫شاهد أيضًا‬

كيف تحدد عمر اطارات السيارة و6 إشارات تدل على ضرورة تغييرها فورا

اطارات السيارة من الأجزاء الهامة جدا، بل تعد الأهم على الإطلاق. فهي الجزء الوحيد في السيار…