2019-08-26

كاوتش العربية أو إطار السيارة .. كل حاجة عنه وبالتفصيل

كاوتش العربية أو إطار السيارة تاريخه ولونه الأسود وايه شكل المنافسة فيه

كل حاجة عن كاوتش العربية أو إطار السيارة

كاوتش العربية أو إطار السيارة كما يقول إخواتنا العرب، أي حد عنده عربية، فاهم كويس ان الوسيط بين عربيته وبين الأرض هو كاوتش العربية

 بس كام شخص يعرف:

كاوتش العربية أو إطار السيارة  ده بدأ ازاي او بيتعمل من ايه ؟

لونه ليه عمره ما اتغير من اللون الأسود؟

ايه اللي يفرق كاوتش عن كاوتش؟

طب نوع كاوتش عربيتك ايه أصلا؟

 

لو عارف يبقى جميل

ولو مش عارف برضه عادي جدا، المهم يكون عندك استعداد تعرف

لأن ده جزء مهم جدا من العربية، وماينفعش أبدا ماتبقاش عارف حاجة عنه.

عشان كدة بنصحك تقرا المقال ده للأخر عشان تعرف قيمة قطعة غالية جدا في عربيتك وليها تاريخ لا يستهان بيه.

 

^^ ملحوظة ^^

*انا مش عارف أقول اطار السيارة ولا كاوتش العربية .. فلو قريت الاتنين في النص سامحني بقى بتلخبط بس، كمان ممكن نقول عجلة برضه عشان احنا نفسنا بنتلخبط .. عادي يعني.

 

تطور كاوتش العربية أو إطار السيارة عبر التاريخ:

غالبا أول اطار ظهر في التاريخ، كان في العصر الحجري، عشان يساعدهم ينقلوا حاجة من مكان لمكان، وكانت العجلة وقتها على شكل حجر،

لكن الحجر ده كان مع أقل احتكاك او صدمة بيتكسر. فكان الحل هو التطور .. فبدأوا يصنعوها من الشجر، وبقت العجلة عبارة عن خشب دائري متشكل.

بعد حبة سنين حلوين، في مصر تحديدا وقت الفراعنة، ظهرت لأول مرة العجلات الحربية اللي استخدمها الهكسوس،

واللي غيرت التاريخ. ومن بعدها بقت تستخدم في الحروب، وأظن الحنطور هو أخر شكل حضاري اتبقى من تطور شكل العربات دي.

مع التطور ومرور السنين وظهور أشكال مختلفة من المركبات “الحاجات اللي بنركبها يعني” اللي استخدمنا فيها العجل ده مثلا عجلات حربية/ حنطور/ عجل عادي. الموضوع بدأ يوسع جدا لحد ما في 1844 بقى يستخدم المطاط.

وبعدين مع ظهور العريبة وبعدين القطر وأخيرا الطيارة .. وصلنا يا سيدي لأخر شكل كلنا حافظينة.. كاوتش العربية المطاطي اللي بلون أسود ده.

بس هو ليه مع كل التقدم والتكنولوجيا الحديثة اللي بتتنافس فيها مصانع السيارات في العالم، ماحدش فيهم بيتنافس على تغيير شكل ولون الكاوتش هو كمان؟

 

ليه لون وشكل كاوتش العربية أو إطار السيارة مابيتغيروش؟

 

بص، احنا لو لسه في العصر الحجري وأيام الفراعنة والهكسوس، كنت قولتلك ماشي، جزع الشجرة ينفع نلونه لبني او اصفر والحجر نبقى نخليه أبيض ولا موف،

لكن ماسألتش نفسك احنا ليه أصلا مش مكملين بنستخدم النوع ده من العجل دلوقتي؟

الحاجات دي مع عوامل الجو ماكانتش مناسبة إطلاقا، لأنها مش بتدي سرعة محترمة تقدر توصلك اي مكان في وقت قليل،

ولا كانت بتستحمل يوتيرن ولا صدمة في مطب لأنك فجأة هتلاقيها 100 حته ع الأرض. ده غير ان الحجر بيهلك بسرعة والخشب الشمس هتبوظة ويتاكل من الحاجات اللي بيدوس عليها في الطريق.

دي كلها كانت أسباب كافية تخلي المخترعين وقتها يتوصلوا لحل الإطار المطاطي المصمت. حاجة كدة شبة اللي موجود دلوقتي الخالق الناطق لكن كلها كلها مطاط.

الكاوتش ده جامد جدا وبيستحمل وبرافو يا ولاد، بس حجمة كان تقيل جدا فحركته بطيئة، فـ هنعمل ايه بقى؟

 

بداية الكاوتش المطاطي:

 

في  1988 واحد اسكتلندي قرر يغير كاوتش عجلة ابنه المطاط المصمت دي، ويبدله باختراع كدة كاوتش قال ايه بيتنفخ هوا.

الفكرة دي كانت موجودة قبل كدة بسنين، بس الشخص ده هو أول واحد ينفذها.

المصدر

 

الشخص ده اسمه جون بويد دنلوب، وباع الاختراع ده سنة 1896. ومن وقتها لحد النهاردة فضلوا يطوروا فيها لحد ما أهو، خرج راسك بره العربية كدة .هتشوف العجلات لسه بتتنفخ هوا.

مصدر الصورة

 

بس ثواني برضة، المطاط حلو وحل مشاكل كتير، بس المطاط أصلا لونه أبيض في حالته الطبيعية، ليه بقى لونه بقى أسود؟

 

ليه كاوتش العربية أو إطار السيارة لونه أسود؟

 

هقولك .. المطاط الأبيض هما استخدموه فعلا في البداية وهو في حالته الطبيعية،

بس اكتشفوا انه كان بيتآكل بسرعة جدا، بس في نفس الوقت كان شغال وهو أحسن الوحشين.

وبعد محاولات كتير، لما جربوا يضيفوا أسود الكربون على المطاط، لقوا ان ده بيحافظ عليه والكاوتش بقى يقدر يستحمل حرارة الجو لفترات أطول بكتير،

ده غير انه منع المطاط انه يتفاعل مع غاز الأوزون والأشعه فوق البنتفسجية وأي اشعة ضارة تانية،

ده كمان بقى يمتصهم ويخرجهم على هيئة حرارة، فبقى عمره أطول، وكل ده بسبب الكربون الأسود،

أو بمعنى أصح، اللون الأسود للكربون، فيغيروه بأنهي منطق؟

 

هل ده معناه ان الكاوتش الحلو ده مش بيبوظ؟

هو اه احنا قولنا انه حلو وبيستحمل وكدة، بس مش معنى كده إنه مش بيبوظ، لأ طبعا بيبوظ عادي جدا،

لأ ويمكن أخطر قطعة في العربية كمان لو ماتغيرش كل مدة حسب تاريخ صلاحيته،

اللي بتبقى مدة مش قصيرة بالمناسبة. لأن المادة السودا بتاعة الكربون بتختفي مع الوقت وده بينتج عنه ان الكاوتش يبوظ منك،

بس احنا مابنبقاش عارفين هيبوظ فين في الطريق ولا والعربية واقفة، فالأسلم طول الوقت، انك تكشف عليه بشكل دوري  وتغيره في وقته المناسب.

ثواني كمان ..

هو أه ليه تاريخ صلاحية وبيستحمل وأسود وحليوه وكل الكلام ده، بس لو استخدمتوه بشكل مرهق هيبوظ قبل تاريخ صلاحيته كمان، يعني لو:

– بتسوقوا في طريق سريع في عز الصيف بكاوتش مايستحملش ولا المسافة ولا مهيئ للحر.

– بتسوقوا في مناطق ثلجية بكاوتش عمق الحفر اللي عليه مابيسمحش بتمرير التلج وماية المطر.

– بتفرملوا فجأة بعد سرعة عاليه

– مابتنضفش إطارات السيارة أول بأول من تراب ورملة وزلط الطريق، وأي حاجة تانية ممكن تكون اتحشرت فيها

– مابتهتمش بظبط الزوايا ولا الترصيص ولا بتقيس ضغط الهوا باستمرار

 

كل دي أسباب تخلي الكاوتش لا قدر الله مش بس يبوظ، كمان ينفجر أو يعطل فجأة أو يعمل أي حركة مش كويسة انت في غنى عنها، فعامة .. خلي بالك.

 

هل مفيش منافسة في صناعة كاوتش العربية أو إطار السيارة؟

هل معنى الكلام اللي فات ده ان كل الكاوتشات أو اطارات السيارة شكل واحد بقى خلاص مش هنغيرها ولا هيبقى فيها منافسة؟

 

لأ طبعا، ليه يعني، اللي يعمل عربية هاتشباك وعربية كابورليه أكيد فكر في حاجات لكاوتش العربية في أشكال وأنواع كتير.

ده كل نوع عربية ليه كاوتش بمقاس معين ماينفعش تغيره لأن ده هيأثر على حركة العربية.

فـ عمرك مثلا ما هتقارن ولا هتبدل كاوتش الماروتي ولا البيتلز بالفور باي فور والهامر، ولا عربيات الدفع الرباعي بالمقطورات وشواحن النقل التقيل.

لكل مقاما مقال.

كمان كل حالة جو ليها كاوتش معين وشكل برضة مناسب. ماهو كاوتش الشتا مع المطر والطين، مش زي كاوتش الصيف مع درجات الحرارة العالية والرطوبة.

 

ايه يفرق كاوتش عن كاوتش؟

– نوعه

في حوالي 90 مليون كاوتش عربية بيتصنع سنويا، فأكيد شركة عن شركة بتفرق.

فأنت لازم تركز شوية وتسأل مثلا الشركة المصنعة دي شركة ايه، بقالها كام سنه، ورأي اللي بيتعاملوا معاها وسمعتها ايه في السوق.

لأن الموضوع دهب يفرق جدا في الجودة والثبات والعمر الافتراضي وحاجات كتير جدا حضرتك،

ساعتها هيظهرلك كام شركة معدودين على صوابع الايد الواحدة تختار ما بينهم أفضل نوع مناسب ليك.

– مقاسه

أه الكاوتش مقاسات، وكل عربية حتى لو من نفس الفئة بيكون ليها مقاس مختلف.

في ناس بتلعب في عربيتها وتدلعها بجنوط عريضة مش مناسبة بس بتدي شكل وثبات أكتر وهكذا، ماشي تمام،

لكن ده بيأثر على عمر الكاوتش وعمر موتور العربية اللي هيستهلك زيادة عن مقدرته بسبب المقاس الأكبر.

فالأفضل ديما لو مش عاوز تكلف نفسك مصاريف تصليحات، انك ماتخاطرش وتجيب مقاس مخالف للي مكتوب في كتالوج العربية.

 

– تاريخ انتاجه

وانت بتشتري كاوتش العربية لازم تقرا الأرقام المكتوبة عليه، من ضمنها هتلاقي تاريخ انتاج الكاوتش، ونصيحة انك تشتري كاوتش تاريخ انتاجه مش بعيد،

عشان أوقات طرق التخزين بتتلف الكاوتش قبل حتى ما تستعمله. كمان خلي بالك يكون مناسب لاستخدامك للعربية.

 

خد فكرة كمان عن:

سرقة العربيات .. طريقتين عشان تحافظ على عربيتك من السرقة

عربيتي بتستهلك بنزين كتير

رخصة القيادة (1-2) ايه أنواعها وازاي تطلعها في مصر

رخصة العربية (2-2) ايه أنواعها وازاي تطلعها في مصر

 

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *

‫شاهد أيضًا‬

كيف تحدد عمر اطارات السيارة و6 إشارات تدل على ضرورة تغييرها فورا

اطارات السيارة من الأجزاء الهامة جدا، بل تعد الأهم على الإطلاق. فهي الجزء الوحيد في السيار…