2019-08-21

أشهر 17 سبب لـ المخالفات وسحب الرخص في مصر

أشهر 17 سبب لـ المخالفات وسحب الرخص في مصر

سحب رخص السيارة

لما نقول أسباب المخالفات وسحب الرخص في مصر، بنفتكر علطول المشهد الكيليشة الموجود في كل الأفلام العربي، لعربية بتقف في أقرب إشارة، وأول أمين الشرطة مايقرب، بيقول الكلمة المشهورة بتاعة:

– رخصك!

يبدأ صاحب العربية يتوتر ويقلق كدة شوية لحد ما يديهاله، وياسلام بقى لو بص فيها وكمل الجملة وقاله:

– أركنلي على جنب

ساعتها بس المشهد بيكمل بحبة ساسبنس حلوين، مع احتمالية سحب الرخص أو تسجيل مخالفة .

السؤال هنا بقى، أمين الشرطة شاف ايه؟، وايه أشهر أسباب المخالفات وسحب الرخص في مصر؟

 

أشهر 17  سبب لـ المخالفات وسحب الرخص في مصر

 

1- الرخصة منتهية 

أسباب المخالفات ولا سحب الرخص اللي زي دي مش محتاجة تتشرح يعني، بس نقولها برضة زيادة تأكيد

كتير مننا في 2019 ولسه بيمشي برخصته بعد ما بتخلص، كسل بقى أو مش واخد باله، النتيجة واحده، انك لو وقفت بيها أكتر من مرة ومادفعتش الغرامة في ساعتها وروحت جددتها، هتتسحب وش.

ده سبب بسيط على فكرة لمخالفة وسحب رخص، بس غرامته ومشاويره الطويلة بعد ما تتسحب الرخصة كتير، فـ جددها يعني مش هتخسر حاجة

 

2- رخصتك مش مناسبة

يعني ايه الكلام ده؟

 يعني بتشتغل أوبر مثلا برخصة خاصة على عربية ملاكي، ودي لحد دلوقتي مالهاش حل فربنا يستر طريقك.

بس مثال زي بتسوق تريلا برخصة أجرة ولا درجة تالته ده هو اللي يستحق الصراحة، لأن رخصتك مابتسمحش بنوعيات العربيات دي أه، فـ يا ماتسوقهاش يا تجددها!.

 

3- ازاز العربية فامية

هنا في مصر، وفي معظم الدول العربية الحقيقة، الفامية ممنوع، ليه؟

لأنه بيخلي اللي بره مش شايف العربية من جوه، وممكن يكون في بلاوي جوه زي خطف أو حاجات مخلة

فتستاهل الصراحة المخالفة، وسحب الرخص لو الأمر زاد عن حده

عشان كدة لو اتمسكت بإزاز فامية من غير تصريح، بتاخد مخالفة “زجاج ملون يحجب الرؤية” وتدفع غرامة والرخص بتتسحب في الحال وماحدش بيقولك معلش

 ليه تستنى تتاخد مخالفه وتدفع مبلغ، لما ممكن بنفس المبلغ أو أزيد شوية تروح تطلع ترخيص فامية، أو تشيله خالص؟

 

4- حاطط ستاير ع الإزاز

معلش، نسيت أقولكم فوق إن مش الفامية بس اللي ممنوع، هو الحقيقة كل وأي حاجة يا باشا بتحجب بتبقى مخالفة وسحب رخص.

والحل؟

نفس اللي فوق بالظبط، ماهو مش عشان الستاير ماسمهاش فامية يبقى يلا بينا وفكرة بمليون جنية.

5- الزجاج فيه شروخ

في ناس بتستغرب جدا لو خدت غرامة عشان في شرخ في بربريز العربية، رغم ان ده من الحاجات الصح جدا، وهقولكم ليه.

ازاز العربية الأمامي، أو البربريز بلغة السوق يعني، من أهم الحاجات اللي في العربية.

 يعني لو قولنا العجل هو الوسيط بينك وبين الأرض، فالبربريز هو الوسيط بينك وبين الطريق نفسه.

عشان كدة، لازم يكون شفاف عشان يديك رؤية واضحة تسهل عليك السواقة، بس ده هيحصل ازاي لو فيه شروخ؟

بعيدا والله عن المخالفات والكلام ده، شروخ الإزاز خطر جدا ومؤذية، ومش ليك لوحدك، ده ليك وللي راكبين معاك.

تخيل معايا الشروخ دي مع مرور الوقت زائد قوة الدفع بتاع الهوا بيحصلها ايه!. بتزيد وبتتمدد وفي أي وقت لاقدر الله ممكن تتسبب في كارثة.

الحل: صلحها لو ينفع، وغيرها لو ماينفعش فيها تصليح.

*معلش الموضوع يمكن مكلف شوية، بس حياتك أغلى أكيد.

 

6- عطلت سير المرور

عارف انت الأفكار اللي فجأة بتطب على دماغك وتصمم تعملها دي؟ .. زي حبة لب بسرعة ولا بطيخة على مزاجي بس هسيب العربية في نص الطريق وراجع علطول.

كلمة راجع علطول دي مكلفة جدا خد بالك.

 

7- كسرت اشارة

أنا عارف أنك اكيد ماتقصدش، والخط الأبيض كلنا بنبوسه من هنا ومن هنا عشان يبقى راضي عننا.

بس معلش

خليها عليك وخلي بالك، كسرها مكلف وانت اللي هتحس بالوجع انا بقولك أهو

 

8- مش رابط الحزام

لو بتعمل ناصح وبتلبس الحزام بس لما تقرب من لجنة ولا لما تشوف عسكري، فانا مش هزعل عشانك أبدا لما تاخد مخالفة على غفلة.

بدل ما اكتب كليشيهات شبه ماما والمتحدث باسم السلامة العامة،

ممكن تشوف الفيديو ده؟

شوفه بس وهتعرف ان المخالفة عشان حياتك تستحق تخاف عليها أكتر من الفلوس:

9- بتسوق عكسي، أو بتلف غلط

انا ساعات ماباخدش بالي

وانت ساعات مابتاخدش بالك

وهو وهي اتعموا فجأة

ماشي،

 بس في ناس بتستهبل صح! .. بنشوفهم كتير انا عن نفسي مش هنكر

انا مش ببرر، بس انت لو لاقيت حد جاي في وشك عكسي بتبقى عاوز تنزل تطلع اي حاجة  خلينا بس ناخد بالنا من الاشارات ونسأل لو شكينا.

 

10- بتسوق من غير رخصة سواقة أو من غير رخصة العربية

حاول ديما ماتسوقش من غير الاتنين، الاتنين مهمين جدا، رخصتك عشان أمين الشرطة وانت وانا وكلنا نبقى عارفين انك بتعرف تسوق

ورخصة العربية عشان نبقى كلنا عارفين انها بتاعتك يعني، ولا هي مش بتاعتك؟؟

 

11- صاحب العربية القديم عليه قواضي، لأن الرخصة لسه باسمه

وانت بتشتري العربية اللي عجباك من صاحبها وهتنقل الملكية، في خطوة بسيطة كدة لازم تعملها، وهي انك تكشف على الرخصة.

5 دقايق في ادارة المرور هيخلوك مأمن نفسك، لأن لو اكتشفت المشاكل قبل ما تشتري ده هيوفر عليك كتير.

 

12- العربية فيها عدد فوق المسموح بيه، وقاعدين ع العربية مش جواها

فرح/ خطوبة/ عزال/ … الخ من الأسباب اللي بتخلينا نحمل ناس كتير معانا، مش عارف أقولك ماتبقاش جدع بصراحة، بس ممكن أقولك اوزنها صح

يعني لا تحمل بزيادة، ولا تمشي من طرق كلها كماين

اعقلها يا برنس، جدع أه، بس مش مستاهلة المخالفة.

 

13- غيرت حاجة في لوحة النمر من غير ما تبلغ بكدة

بيقولك ايه، لوحة النمر دي مش بتاعتك، دي بتاعة الحكومة، فلما تيجي تغير اي حاجة فيها ارجعلهم الأول، وده صح جدا.

وبعدين بتغير في النمر ومش عاوز تدفع مخالفة؟

ادفع يا بابا ادفع

 

14- الردار قفشك

هوووب .. أسرع واحد في شبرا الردار قفشة، شوفتني وانا بقول أسرع مش أشطر؟ .. ماهو ايه الشطارة في كدة يعني؟

كل ردار بيكون في مكان مكتوب فيه بخط مقروؤ السرعة المسموحة، ليه تخاطر بنفسك وبغيرك؟

لو قد المخالفة اعمل فيها شجيع السيما براحتك

بس لو خايف تتعور، التزم يابني الله لا يسيئك ماعدتش فيه لا صحة ولا فلوس للكلام ده

 

15- لو كنت تحت تأثير أي نوع مخدر

طيب، هو عامة ده ممنوع في أي مكان في العالم، مش محتاج أقولك أسباب، بس حتى لو كنت في أمريكا، اركب تاكسي أكرملك

 

16- ماشي بره خط سيرك اللي محدداه الرخصة

ده بيكون أكتر للعربيات الأجرة، التاكسي والأتوبيسات وكدة، لأن رخصتهم بيبقى متحدد فيها خط سير محافظة مثلا.

يعني تاكسي ابيض في اسود يبقى حدوده القاهرة، وجوده في بورسعيد من غير تصريح من ادارة المرور التابع ليها بيبقى مخالفة، فخلي بالك

 

17- مخالفة أمن ومتانة

الموضوع هنا كبير أوي، وعاوز مقال لوحده، بس خليني اختصرلك الموضوع بإن كل تنتوفه في العربية لو مش متظبطة، بمخالفة.

ازاز العربية

الرفرف

الأبواب

الجنوط

العفشة

حاجز التصادم

دهان العربية

طفاية حريق

المرايات

الخ الخ

 

كل ده لو مش مظبوط بيكون مخالفة، وده كله بيتظبط في الصيانة الشاملة الدورية اللي المفروض تكون بتعملها للعربية.

مابتعملهاش؟

شكرا .. اقف ادفع بقى يا برنس.

 

 

غالبا أسباب المخالفات وسحب الرخص مابتخرجش عن الـ 17 سبب دول، واللي يخرج منهم حاجات فرعيه كتير

نبقى نقولكم عن كل حاجة منها لوحدها في مقال جديد

بس دلوقتي خدوا بالكوا من دول ومش هتلاقوا نفسكوا بتقعوا في مخالفات سير كتير تاني ان شاء الله

خد فكرة كمان عن:

رخصة القيادة الدولية .. شروطها وازاي تطلعها في خطوات بسيطة

رخصة العربية (2-2) ايه أنواعها وازاي تطلعها في مصر

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *

‫شاهد أيضًا‬

كيف تحدد عمر اطارات السيارة و6 إشارات تدل على ضرورة تغييرها فورا

اطارات السيارة من الأجزاء الهامة جدا، بل تعد الأهم على الإطلاق. فهي الجزء الوحيد في السيار…