2019-07-29

ما هو المحرك التربو .. أنواعه ومميزاته وعيوبه وكل حاجة عنه بالتفصيل

ماهو الفرق بين المحرك العادي والمحرك التربو

 عارف ايه هو المحرك التربو؟

أسمع عنه

جربته؟

لأ

يبقى لازم تعرفه

ما هو المحرك التربو ؟

التربو هو جهاز بيساعد محرك العربية بتاعتك على حرق بنزين أكتر عن طريق انه بيدخل هوا أكتر لغرفة الحرق

ده التعريف الحرفي ليه، بس عشان نفهمه لازم نقارنه بالمحرك العادي ونعرف الفرق بينهم، فـ تعالى الأول أقولك المحرك العادي هو ايه وبيشتغل ازاي أصلا!

تعريف المحرك العادي:

المحرك هو الأداة اللي بتحرك أي حاجة بتمشي اتوماتيك، والمحركات أول ما اخترعوها كانت عشان السفن وكدة، وكانت الطريقة اللي اكتشوفها ساعتها هو قوة الدفع بالفحم. يحرقوا الفحم فالماية تتبخر، البخار ده يتضغط ويستخدموه في دفع مكابس موصولة بعامود حركة بيحرك العجل وتمشي نورماندي على بركة الله.

بس النوع ده قل انتاجه جدا، لأن تصنيعه نفسه كان صعب، وبالتالي صيانته، فقالوا تعالوا نطوره طيب يمكن نطلع بحاجة أحسن وأسهل، وياريت لو أسرع.

وبعد سنين كتير، خصوصا بعد اختراع العربية يعني، ومع بداية القرن العشرين، ابتدوا يعتمدوا على البنزين بعد حرقه في حركة العربيات وسرعة كل عربية بتكون على حسب قدرتها .. بس ده بيحصل ازاي؟

عشان نعرف بيحصل ازاي .. لازم نعرف بيتكون من ايه!

المحرك بيتكون من الكام حاجة دول:

بوجيهات – صمامات – مبرد – مكابس “اللي بنقول عليها بساتن” – حلقات مكابس

وأهم حاجة بقى في كل ده  السلندر “غرفة الاحتراق”. وده بيكون على شكل اسطوانة، الاسطوانة دي بيتجمع فيها الهوا بعد ما يعدي على فلتر الهوا وبعدين بيتضغط جواها فيساعد على حرق البنزين اللي بيدخل برضة عن طريق فلتر البنزين، فـ يدي قوة للعربية انها تتحرك.

العربية الواحدة ممكن تبقى 4 / 6 / أو حتى 8 سلندر. والسلندرات دي بتتركب بـ 3 أشكال مختلفة:

وضع مستقيم

يعني بتكون جنب بعضها بس بشكل طولي والبساتن طالعة نازلة بشكل عامودي .. وبيكون موجود عادة في أنواع معينة من الام بي دبليو، في الفولفو والأودي الخمسة سلندر

على شكل حرف V

، يعني على شكل خطين بزاوية حادة، وده لما بيكون راكب في عربية غالبا بتلاقي مكتوب ع العربية 6V/ أو 8V. هنا البساتن بتتحرك بدرجة ميل بتختلف من شركة للتانية .. وبتكون موجودة في عربيات زي البي ام دبليو والمرسيدي والاندكروزر.

خطين متوازيين

وده محرك مش منتشر في العربيات، وده أكثرهم قوة بسبب مقاومته الزيادة للجاذبية. المحرك ده عزمه بيكون عالي جدا، بس بيكون صيانته غالية شوية فماتلاقيهوش غير عربيات زي البورش والسوبارا

امتى هتحتاج المحرك التربو؟

غالبا انت مش هتعرف التربو، إلا لو فكرت تزود قوة المحرك بتاع عربيتك، اللي هو محرك عادي طبعا. والمحرك العادي عشان تزود قدرته، لازم تزود الحرق، وده هيخليك يا إما

  • تزود عدد الاسطوانات فالهوا والبنزين يزيدوا وبالتالي القدرة،

أو

  • تزود سعة السلندر، كل واحد لوحده حسب عربيتك كام سلندر، وبكدة هيزيد الحرق برضة والقدرة هتزيد

طب وايه اللي هيجيب سيرة التربو في الموضوع ده؟

بص، لو عربيتك تستحمل وتصميم ماتورها يجيب، طبيعي هتيجي. لأنك لو روحت لأي ميكانيكي بيفهم وقولتله عايز تعمل حل من الاتنين اللي فوق دول هتلاقيه بيقولك بكل ثقة “ماتركب تربو يا باشا”. هو على فكرة مش هيكون بيستسهل، بالعكس ده كدة هيشتغل على كل حته في الموتور بتاع العربية، زي:

البساتم

السبايك

الجوانات

الشنابر

البلوك

عشان يتطمن ان كل الأجزاء اللي بتواجه الضغط والطاقة الزيادة في السلندر هتستحمل التربو، فمش حل سهل ركب وامشي يعني. بس ايه هو التربو؟ ..

ما هو المحرك التربو؟

التربو جاي من كلمة توربينه، لأنه شبه التوربينه الصغيرة.

والتربو عبارة عن جهاز بيساعد المحرك يحرق بنزين أكتر بإنه بيدخله هوا أكتر، فيدي طاقة وقدرة أكبر من اللي ممكن ناخدها من نفس الموتور من غير تربو

صعبة؟

 طب خليني أشرحلك أكتر

المحرك التربو بيعمل ايه؟

ببساطة، بيخلي عربيتك الـ 1600 سي سي ليها تقريبا نفس القدرة لموتور 2700 سي سي عادي.

ازاي؟

عارف حركة الموتور بتاعك العادي خالص!، التربو بيزود عليها شدة صغيرة كدة تزود عزمة وسرعته فتلاقي نفسك راكب صاروخ بنفس سعة المحرك القديم

والشدة دي بتيجي بسبب تكوينة التربو نفسه اللي بتأهله يزود سرعة المحرك من غير ما تزود حجم المحرك نفسه خالص.

المحرك التربو بيتكون من ايه؟

بيتكون المحرك التربو من مروحتين متركبين على عامود واحد، وبيلفوا في نفس الإتجاه، لكن اتجاه الريش نفسه عكسي.

وبيشتغل عن طريق إن مروحة تشد هوا تدخله جوه غرفة الحرق والتانية بتخرج الهوا النهائي اللي بيكون على شكل عادم.

مميزات المحرك التربو:

المميز في المحرك التربو ان حركة المروحتين بيعملوا دايرة كاملة، بحيث إن المروحة اللي بتدخل هوا للمحرك، بتستغل الهوا الخارج من المروحة التانية اللي على شكل عادم وتشده وتضغطه وبعدين تدخله تاني جوه المحرك تاني فالعزم والقوة يزيدوا، عشان زي ما انت عارف:

“كل ما كمية الهوا كترت في السلندر كل ما حرق البنزين كان أفضل” 

وده بيدي قوة أكبر للعربية فيخليها تمشي صاروخ

فكدة يكون المحرك التربو بيضرب عصفورين بحجر واحد. بيزود سرعة العربية وبيحمي الجو من التلوث البيئي.

عرفنا مميزات التربو، ممكن نعرف عيوبة؟

عيوب المحرك التربو:

1- هواء العادم بيكون سخن

النظرية العلمية بتقول إن كل الهوا ما كان سخن كل ما قلت فيه نسبة الأكسجين، والحقيقة إن مهمة التربو الأساسي انه يدخل أكسجين أكتر يساعد على حرق أكتر، ده غير ان السخونية دي غلط على المحرك. عشان كدة أحب أعرفك بالسربنتينه، أو خلينا نقول زي ما مسمينها الخواجات “inter cooler”. ودي حاجة مهمتها انها تبرد الهوا اللي داخل الموتور عن طريق التربو، وده يبرر ليه العربية في الشتا بتسحب أسرع وأحسن من الصيف. 

بس خلي بالك تكون ظابط المبرد انه مايتلجش الموتور برضه، حاول توصله لدرجة الحرارة المناسبة للموتور عشان يقدر يحرق البنزين والانفجار المطلوب يحصل.

2- محتاج مكان

التربو مش جهاز كدة هتحطة وخلاص، ده لازم يكون فيه مكان للتربو وملحقاته في كبوت العربية.

من ملحقات التربو بقى السربنتينه، اللي هتأخد لوحدها حيز محترم، ولازم تكون موجودة فلازم يتعملها حساب. فالميكانيكي لو قالك لأ العربية ماتستحملش يا باشا، اعرف انها فعلا مش هتستحمل.

3- السرعة الزيادة ممكن تحرق الموتور

رغم إن الهوا الداخل حلينا مشكلته، بس تظل السرعة العالية حمل زيادة على الموتور لأنه غير مؤهل من البداية في وقت تصنيعة للسرعة العالية دي والبساتم مش هتستحمل، فالسرعة الزيادة هتقلل من عمر الموتور وممكن تحرقه كمان. عشان كدة العربية اللي تستحمل لازم يتعمل فيها حبة تعديلات للموتور، زي:

  • تغيير القطع المش مناسبة للتربو بقطع تانية مناسبة أكتر، زي البساتم، ممكن نركب بساتم رياضية
  • تركيب رادياتير حجمه أكبر
  • طبعا مبردات داخلية
  • عمل فتحات تهوية في غطا المحرك أو الاكصدام، ودي حركة سهلة
  • تركيب نظام عادم رياضي 

والميكانيكي في النهاية هو اللي شايف العربية والرأي الأخير ليه، وده في حالة انه ميكانيكي ثقة طبعا وشاطر.

وممكن تقرا أكتر عن عيوبه هنا: ما هي عيوب المحرك التربو في السيارة وكيفية المحافظة عليه

في بديل للتربو؟

في .. السوبر تشارجر

وده بيأدي نفس وظيفة التربو في مضاعفة القوة للمحرك العادي بإنه بيدخله هوا أكتر فيحرق أكتر، عن طريق استخدام كومبروسر لدفع الهوا ده.

الفرق بين السوبر تشارجر والتربو:

السوبر تشارجر مرتبط بالموتور، والكومبروسر بتاعه مربوط بعمود الكرنك. وبمجرد ما تحط المفتاح وتشغل العربية، بيشتغل اوتوماتيك، وبدون ما يحتاج العادم. هو كل ما العمود ده حركته زادت كل ما سرعة السوبر تشارجر زادت.

التربو غير كده. التربو لازم تشغل العربية وتمشي بيها شوية قبل ما يشتغل، ومابيقومش غير بعد عدد RPM عالي، وده ليه مصطلح اسمه “Lag” أو تأخير التربو.

طيب ايه أحسن، المحرك التربو ولا السوبر تشارجر؟

والله في ناس ممكن تشوف إن الـ Lag  ده عيب في التربو، بس لو جيت فكرت فيها هتلاقي انها ميزة. ليه؟

السوبر تشارجر بيشتغل علطول ماشي، لكن حتى لو وصل لأقصى قوته، بتكون أقل من التربو.

كمان التربو بيعتمد بشكل أساسي على العادم اللي بيفضل يطلع طول ما العربية شغالة، لكن السوبر تشارجر بيعتمد على الهوا اللي في الجو، فلو مثلا في الصيف عاوز تشغله، موتور العربية بيتعب لأنه بيأخد من قوته عشان يشتغل، فالتربو أوفر على كل المستويات.

عيب التربو انه محتاج تفصله كل فترة عشان الموتور مايتحرقش، بس ده نوع من أنواع الأمان والحفاظ على سلامتك انت والعربية، اه انت مركبه عشان تمشي سريع بس حتى الطريق بيكون ليه نظام.

ولو مصمم تحسب الـ Lag ضمن عيوب التربو، وعاوز حل. في ناس بتركب تربو خفيف anti lag. وممكن كمان تركب اتنين، واحد سريع والتاني خفيف، عقبال ده ما يشتغل يكون الخفيف قايم بالواجب

خد بالك:

  • أقل بنزين ممكن تحطه للعربية التربو هو 92، أقل من كدة الموتور هياكل بنزين ومش هتحس بالتربو في العربية خالص.
  • دي مش مفاضلة مننا على نوع معين، ولا كدة الموضوع خلص، لكن ده شرح بسيط للي ماعندوش فكرة خالص عن المحركات وانواع الأجهزة المساعدة على زيادة القوة والعزم. طبعا في عربيات سريعة من غير تربو أو سوبر تشاجر ومناسبة لفئه كبيرة من اللي بيسوقوا فلا محتاج ده ولا ده. بس خلينا نتكلم في الموضوع ده في مقال منفصل.

 

خد فكرة كمان عن:

اعرف كل حاجة عن فتيس الـ CVT?

فتيس/ ناقل الحركة DSG .. ايه هو وازاي بيشتغل؟

ايه هي العربية الهجينة أو الهايبرد .. وليه المفروض تجربها؟

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *

‫شاهد أيضًا‬

كيف تحدد عمر اطارات السيارة و6 إشارات تدل على ضرورة تغييرها فورا

اطارات السيارة من الأجزاء الهامة جدا، بل تعد الأهم على الإطلاق. فهي الجزء الوحيد في السيار…