2019-07-23

البيتلز .. حكاية مابتخلصش

البيتلز .. حكاية مابتخلصش

ناس كتير في بداية مشوارك في السواقة، هتبتدي تفتي وتنظر على أول عربية المفروض تشتريها، وبين الاختيارات الكتير اللي هتتحط جواها بسبب ميزانيتك المحدودة وخط سيرك وحظك العسر انك وقعت وسط الناس دي، للأسف مفيش كتالوج للموضوع ده ولا كتاب اسمه “مواصفات أول عربية يجب أن تقتنيها” ممكن أرشحهولك. بس خليني أقولك ان لو البيتلز اختيار ضمن الاختيارات المتاحة والمناسبة لميزانيتك، وانت رفضتها لأيا كان السبب .. فـ انت الخسران.

 الأول ايه هي البيتلز؟

االبيتلز .. حكاية  ؟ البيتلز هي العربية الخنفساء الكوبية، أيوة العربية البابين اللي بتشوفها مركونة في أي جراج وأي شارع، واللي احتمال لو دورتها تلاقيها شغالة عادي. وهي هي نفس العربية اللي لو شوفتها ع الطريق هتتريق عليها وعلى اللي راكبها عشان انت بس ماتعرفش حكايتها.

طب ايه حكايتها؟

الموضوع يا سيدي بدأ سنة 1938، لما هتلر قبل الحرب العالمية التانية طلب من  المهندس النمساوي الألماني Ferdinand Porsche انه يعمل عربية على قد امكانيات العمال والشعب الألماني، حاجة مشابهه للأوتومبيل الفورد موديل T اللي انتشر في الولايات المتحدة الأمريكية في الوقت من 1908 لـ 1927،  فعمل الخنفسة وسموها عربية الشعب، ودي الترجمة الحرفية لـ Volkswagen. واتباع منها حوالي 21 مليون عربية، وده خلاها تعدي الفورد في المبيعات فعلا.

البيتلز تعتبر فخر الصناعة الألمانية، وده مش تريقة خالص. هات أي عربية بيتلز ألماني وأي عربية قريبة منها في السعر والإمكانيات، مثلا الـ 128، وقارن بين زياراتهم للميكانيكي. هتلاقي ان البيتلز معمرة وموفرة جدا. أكتر حاجة ممكن تصرف عليها فيها هي قطع الغيار لأن الألماني منها بتحتاج قطع غيار أصلية، بس ده بيحصل كل كام سنه، فلو لسه بنقارن .. البيتلز كسبان بجدارة.

تاريخ البيتلز على مر السنين:

1938

دي كانت البداية، لما هتلر طلب صناعتها. بس الحرب العالمية التانية لما بدأت سنة 1939، يعني بعدها بسنة واحدة بس، كانت السبب إن الصناعة كلها تقف والعربية ماتكملش.

1946

مصدر الصورة

الحرب خلصت في 1945، وعقبال ما البلد بدأت تشم نفسها شوية، قررت فولكس فاجن تفتح المصنع تاني في 1946. وانتشرت العربية بعدها، مش بس في ألمانيا، كمان في أمريكا والبرازيل والمكسيك وبريطانيا وجنوب أفريقيا، بس تظل البيتلز الأصلية ألماني.

سعة المحرك وقتها كان بيبدأ من 985 CC وبقوة 24 حصان، لـ 1131 CC وقوة 25 حصان. الكلام ده تقريبا لحد سنة 1952

1953 وانت طالع

من بداية 53، بقى في منها موديلات 1192 CC بقوة 30 حصان، زائد حبة تعديلات عشان راحة اللي بيسوق.

في الوقت ده، تحديدا في 54، فتحت فولكس فاجن مصنعها فيالمكسيك، والبيتلز بدأت تتباع في الأسواق الأجنبية. وفي 55، اتصنع حوالي 230 ألف عربية بيتلز، كان منهم 35.581 عربية اتباعت في الولايات المتحدة الأمريكية بس

1957 وانت طالع

حصل حبة تغيرات في البيلتز، كبروا الشبابيك الجانبية أكتر، غيروا في المحرك، فبقى في منه 1192 CC برضة، بس بقوة 34 حصان .. والـ 1285 CC  بقوة 40 حصان. وفي أغسطس 1966، وصلوا بالمحرك لـ  1493 CC بقوة 44 حصان  .. يا مسهل، ماشية بتعرج أهي

1968 وانت طالع

حصل أول تغيير في الاستايل بتاع البيتلز في 68، أهم حاجة فيه إن بقى في غطاء خارجي للبنزين، ووصلت المبيعات وقتها في الولايات المتحدة بس، لـ 563.522 عربية، فبقت أكبر أسواق البيتلز الأجنبية.

البيتلز في الوقت ده اتصنع منه موديليين الـ 1302 والـ 1303. الـ 1302 وده سبب رئيسي في ندرة قطع غيار العفشة الأمامية بتاعتها

سعة المحرك بقى في الفترة دي بقى متنوعة أكتر، يعني عندك مثلا:

1285 CC بقوة 44 حصان

1992 CC بقوة 34 حصان

1493 CC بقوة 44 حصان

 1584 CC بقوة 50 حصان

حاجة برضة ماينفعش نفوتها، ودليل على شهرة البيتلز في 69، وهو ظهور العربية في فيلم Love Bug انتاج والت ديزني، العربية ماكنتش مجرد حدث عارض في الفيلم، دي كانت البطل الرئيسي.

0197 وانت طالع

ظهر جيل جديد من البيتلز، اللي هو Super Beetles. وده مسمى بينطلق على موديلات 1302 والـ 1303 اللي مهما دورت مش هتلاقي منها غير ألماني بس، وده ليه ميزه وعيب، العيب ان قطع غيارها هتكون كلها أصلي وغالية، والميزة إنها هتعيش معاك فترات طويلة.

الموديلات دي بتختلف عن الموديل الأصلي في ان الكبوت بتاعها أعرض وأكبر، كمان عفشتها مثلا سوست ومساعدين مش دنجل فمريحة أكتر، غير الطابلوة العريض اللي من الجلد، والجنود اسبور والإزاز اللي ابتدى يتحول من فلات لكيرفي،  ومحركات العربية نفسها واصلة لـ 1600 CC وقوة أكتر من 50 حصان .. دي حاجات وقتها كانت  ممتازة بالنسبة للفئة السعرية دي.

1980  

دي كانت أخر سنة يتصنع فيه السوبر بيتلز …

1998

ظهور الجيل التاني من البيتلز، عربية عكس البيتلز القديمة، المحرك قدام وبتشتغل دفع رباعي. العربية نفسها تصميمها الخارجي كان عصري ومناسب للجيل الجديد. وبعدها بفترة مش كبيرة، ظهرت الـ Beetle RSi  .. ودي واحدة من أحسن عربيات الجيل التاني من الـ Beetles. العربية دي اتصنع منها حوالي 250 عربية بس في مصنع المكسيك. بتشتغل على 6 سرعات وبقوة 221 حصان.

2019

يوليو 2019 أخر محطات البيتلز. أعلنت الشركة أخر جيل من البيتلز في العالم، الجيل التالت وكفاية علينا كدة بقى. العربية الأخيرة هي عربية كابورليه مفتوحة بمحرك تربو 2000 CC. اربع اسطوانات وبقوة 174 حصان وناقل حركة اتوماتيكي 6 سرعات.. وبس

شكرا بيتلز.

هو مفيش سبب ممكن احطه هنا لإنهم وقفوا الانتاج اكتر من ان البيتلز بقالها 80 سنة، وفولكس فاجن عملت موديلات كتير جدا، والشركة شافت انهم عملوا منها كل حاجة مفتوح ومقفول وكفاية بقى مش عارفين نجدد تاني.

مين يسوق البيتلز؟

بص، هو تكاثرت الأقاويل، بس خلينا نقول إن أي حد يقدر يشتري البيتلز، بس مش أي حد يقدر يسوقها. البيتلز بيحكمها مساحتها الداخلية عشان ضيقة شوية، وفي منها موديلات مالهاش شنطة أصلا، وقليل جدا من اللي عاوزين عربية في البداية انهم يستحملوا ده، عشان كدة في شرطين مهمين جدا لازم تاخد بالك منهم..

شرطين يجب توافرهم في راغبي اقتناء البيتلز:

  1. هتسوقها لوحدك

البيتلز مساحتها مش كبيرة فتقدر تقول أنها أحسن لو هتسوقها لوحدك، أو يكون معاك شخص تاني بالكتير، سواء لسفر أو تقضية مشاوير يومية. وده عشان تقدروا تستمعوا انتوا الأتنين خصوصا إن الكنبه اللي ورا شبابيكها دايما مقفولة فاللي هيقعد ورا هيتحبس حبه حلوين لحد ما توصلوا. وده يخلينا نقول انها أفضل اختيار للمش متجوزين وطلاب الجامعات واللي عاوز/ة المشاوير اليومية من غير زحمة وطلوع ونزول.

  • انك تكون مش محتاج شنطة

البيتلز القديمة مالهاش شنطة تذكر، ولو فيها شنطة في الموديلات الحديث فهي أصغر من المعتاد، فمش هتقدر تعتمد عليها أوي. يعني لو لازم توصل حاجة أو مسافر لمدة طويلة ومحتاج تنقل حاجات فيها، حاول يكون معاك شخص واحد تاني بالكتير وتحمل اللي انت عاوزة على الكنبه.

  • انك تكون كلاسيكي

أكتر حاجة بتجذب في البيتلز، هو تصميمها، اللي ماتغيرش من وقت تصنيعها من 80 سنة. متخيل كام حد معروف ركبها خلال الـ 80 سنة دول! .. خصوصا في البدايات!. عشان كدة البيتلز عاوزة حد بيفهم في القديم كويس أوي فيعرف يحافظ عليها، ويبقى عارف كويس أوي إن العربية حصل فيها تغييرات كتير من وقت ماتعملت طبعا، بس هي كانت ومازالت خنفسه، والله غيروا سرعات بوجيهات سقف أو من غير ولا حتى حطوا تكييف وبقت تلاجة من جوه .. هتفضل على شكل خنفسة، ودي حاجة حلوة على فكرة.

ايه يشجعك تشتري عربية بيتلز؟

أقولك:

  1. عربية ينفع تجرب فيها أي حاجة  
  2. لو لسه بتتعلم، فهي عربية سرعات قليلة، ولو سواق محترف، تقدر تخليها عربية سباقات وانت وشطارتك
  3. عربية انتيكه ينفع تدلعها وتتمنظر بيها
  4. شغالة معاك في كل حاجة ومابتشتكيش، مجرد زيارة مرة أو مرتين في السنة بالكتير للميكانيكي
  5. خط انتاجها وقف خلاص، فعد العربيات الموجودة على صوابع ايدك
  6. عشان تقدر تنضم للقاءات البيتلز اللي بتحصل في مصر
  7. عشان هي من أوائل العربيات اللي اتعملت ولسه بتمشي في الشوارع عادي لحد النهاردة
  8. في أنواع معينه من البيتلز هتدوخ على قطع غياره، بس في نفس الوقت هتفرح جدا وانت بتغيره وتلاقي ان القطعة اللي باظت دي عايشة بقالها فوق الخمسين سنة

عيوب البيلتز:

  • البيلتز قبل السبعينات كلها دنجل
  • البيلتز الألماني بس قطع غيارها غالي جدا، لكن الباقي كله ليه قطع غيار أمريكي وبرازيلي ومكسيكي
  • كنبتها ضيقة فلو عندك اتنين صحاب طوال شوية هيعقدوك فيها
  • شكلها قديم .. وده ناس كتير بتتخطاه بحبها الحقيقي للعربية وبالديكورات المتاحة دلوقتي
  • التريقة، عشان كدة لازم اللي يجيب بيتلز يبقى عارف هو سايق ايه وازاي يدافع عنه ويحبب كل اللي حواليه فيها

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *

‫شاهد أيضًا‬

تعرف على أسعار فيات تيبو الجديدة 2020 بعد تطبيق زيرو جمارك

سيارات فيات تيبو الجديدة 2020 هل تفكر في شرائها؟ .. حسنا، اختيار موفق، ليس للسيارة فقط، ول…