2019-07-23

أهم أسباب زيادة استهلاك البنزين في عربيتك

أسباب زيادة البنزين

زيادة استهلاك البنزين فجأة بيخلينا نحس ان في حاجة غلط، ولما زيادة الاستهلاك تتعدى الحد الطبيعي بمراحل، بنركز أكتر عشان نلاقي السبب ونعرف إن كان ده طبيعي أو لأ.

 ودي أسهل طريقة تقدر تقيس بيها الاستهلاك بنفسك وبشكل سريع.

بعد ما تفول عربيتك، امشي مسافة محددة، وليكن 100 كم مثلا، وحدد السرعة اللي ماشي بيها،

واقسم المسافة على البنزين اللي اتحرق من العربية هيطلعلك استهلاك عربيتك. هات الرقم ده وقارنه بالرقم المكتوب في كتالوج العربية.

 لو نفس الرقم يبقى استهلاك العربية طبيعي والعربية سليمة، أما لو زايد عن الطبيعي، فكدة في مشكلة من اتنين هي اللي بتسبب زيادة استهلاك البنزين:

أهم سببين لـ زيادة استهلاك البنزين في عربيتك:

يا إما

مشكلة في العربية نفسها

أو

المشكلة فيك انت

تعالى نشوفهم واحدة واحدة كدة…

1- لو المشكلة في العربية نفسها:

دي محتاجة زيارة للميكانيكي اللي بتتعامل معاه، لأن العلاقة بين استهلاك البنزين وسلامة العربية علاقة طردية،

يعني أول ما الاستهلاك يزيد، اعرف ان العربية فيها حاجة وش، والحاجة دي مش هتخرج عن دول:

كاوتش العربية باظ

أول حاجة المفروض تعملها قبل ما تركب عربيتك، هو مراقبة الكاوتش وقياس ضغطه. الموضوع من بعيد يبان لطيف، بس من قريب هتشوف بلاوي  ولازم تتصرف وتحلها، زي:

  • حبة تشققات في الكاوتش تقول ان الكاوتش ده لازم يتغير، فعند أقرب بتاع كاوتش وغيره طبعا لأن التشققات دي بتقول ان عمر الكاوتش الافتراضي قرب ينتهي
  • الكاوتش منفوخ وخارج بره، ودي مابتحصلش كتير، بس يستحسن انك تغير الكاوتش في أقرب وقت
  • الكاوتش مخروم، يعني هوا خارج .. يعني ترييح ع الطريق فجأة، يعني غيره غيره
  • في حصى وزلط بين فتحات النقشات على الكاوتش، وهنا ممكن ماتغيروش لأ، بس نضفه كويس يا برنس، وأول ما تتطمن انه مابقاش في حاجة خلاص، امشي بالعربية وربنا يستر طريقك
  • ضغط الكاوتش أقل أو أكتر من الطبيعي اللي مكتوب في كتالوج العربية، وده هتعرف تقيسه بجهاز الضغط اللي المفروض في العربية علطول. حاول ماتمشيش الا وانت متأكد ان الضغط مظبوط عشان العربية ماتحكش وتستهلك بنزين زيادة

الفلاتر عاوزة تتنضف

لازم تعرف في البداية إن العربية الواحدة بيكون فيها حوالي 5 فلاتر (فلتر زيت محرك، فلتر زيت ناقل الحركة، فلتر بنزين، فلتر هواء مكيف، فلتر هواء المحرك)

بمجرد ما تحس أن استهلاكك للبنزين زيادة عن الطبيعي، أول حاجة لازم تعملها هو الكشف الأول على فلترين منهم، فلتر البنزين .. وفلتر الهوا، اللي لازم يتغيروا بشكل دوري كل 30 ألف كلم تقريبا، بس ليه؟  

فلتر البنزين لأن مهمته توصيل البنزين نضيف للمحرك، ومع انسداده البنزين بيوصل بشوائبة للمحرك فيتحرق بسرعة ويبوظ المحرك وده هتعرفه لما تشم ريحة عادم وحشة خارجة من العربية.

فلتر الهوا برضه ليه نفس دور فلتر البنزين، في تنقية الهوا اللي داخل للمحرك، ولو اتسد فده معناه إما الهوا اللي هيدخل للمحرك هيكون فيه تراب وشوائب ويقلل من عمره الافتراضي ويبوظ،

او مايدخلش هوا خالص بسبب انسداد الفلتر والمحرك يضعف ويبوظ برضة بعد فترة قصيرة، وفي الحالتين هيكلفك استهلاك بنزين أكتر من المفروض.

نوع البنزين مش مناسب

كل عربية بيكون معاها كتالوج مكتوب فيه مواصفات وارشادات خاصة بيها،

ومن ضمن الارشادات دي هتلاقي نوع البنزين المناسب لعربيتك بدرجة أوكتان معينه، يعني مفيش رفاهية للأختيار. فحاول على قد ما تقدر تلتزم بالنقطة دي كويس أوي.

كمان خزان الوقود لازم يتنضف باستمرار، وبمواد منظفة من شركات متخصصة. دي طريقة من طرق رفع كفاءة الخزان وزيادة فعاليتة وبالتالي تقليل استهلاكة.

البوجيهات اتحرقت

البوجية ده باختصار عبارة عن حاجة بتطلع شرارة عشان خليط الهوا والبنزين يولعوا فالمحرك يشتغل،

فبيسموها قلب المحرك بسبب أهميتها في المحافظة على منظومة الكهربا جوا العربية، وبيسموها بشكل حرفي كدة “شمعات الأحتراق” ..

بس ثواني،

انت ممكن تكون شمعة بتحترق من أجل الأخرون ومانغيركش عادي، بس البوجيهات أول ما تتحرق لازم تغيرها حضرتك، معلش وماتستناش عليها كمان،

لأن زي ما قولتلك هي قلب المحرك، وعمرها الافتراضي بيكون بين 18000 كلم و 40000 كلم،

ولو باظت العربية هتطلع من مكانها بصعوبة وباستهلاك بنزين أكتر، فمش هنجبلها دكتور مجدي يعقوب مخصوص يعني.

اتحرقت = تتغير #معروفة

ولا حاجة من اللي فوق، يبقى هتنضف حاجة من دول

حساس الشكمان، البوابة، علبة البيئة

أول ما الميكانيكي يقولك حاجة منهم قوله أمين، اشتغل ياسطى

الفحص الدوري

في النهاية، وقبل ما تمشي من عند الميكانيكي، لازم تعرف ان المشكلة بتبدأ أول ما تبطل تفحص العربية بشكل دوري.

ودي ما بتبقاش زيارة مالهاش لازمة طالما العربية شكلها سليم زي ما البعض بيتخيل، لأن مشاكل العربية مش ديما بيبقى ظاهر،

وانك تلحقها أول بأول أحسن من ان المشكلة تتفاقم لحد ما تظهر فجأة، وانت وحظك هتظهر وانت فين؟

ــــــــــ

 لو عملت كل اللي فوق ولسه العربية بتاكل بنزين،

تبقى المشكلة فيك “انت”

2- لو المشكلة فيك انت، ازاي تحلها؟

ماتاخدهاش بس بشكل شخصي وتعالى أقولك ممكن تكون بتعمل ايه يخلي العربية تستهلك بنزين أكتر:

بتمشي على سرعة فوق الـ 80

الجري على الطريق وبسرعات عاليه بيزود مقاومة العربية للهوا، خصوصا لو ماشي في طريق عكس اتجاه  الرياح فالعربية بتضطر تستهلك بنزين زيادة.

بتمشي بسرعة فجأة وتقف برضة فجأة

واحد حكيم زمان قالي إن أحسن طريقة تخلي عربيتك ماتحرقش بنزين وتمنع اللي جنبك من انهم يقولوا كلام مش لطيف،

انك تطلع ع الهادي وتزود بنزين بشكل تدريجي، عربيتك هتتبسط واحنا كمان.

فـ سؤال بقى معلش .. ليه تكون واقف وفجأة تطلع بالعربية؟

ليه ها!.

لو بتعمل كدة كتير يبقى ماتسألش عن البنزين وتقول زيادة استهلاك البنزين في عربيتي وبتاع

خالص وفول وانت ساكت.

دواستين البنزين والفرامل مش معمولين عشان تبدل بينهم كل 3 ثواني، ودانا وجعتنا وقلبنا نط من مكانه يا برنس.

بتمشي في شوارع بايظة

رمل وزلط ومنحنيات وتكسير، عارف انك مضطر، بس ده كله بيخلي العربية تعافر عشان تعدية سليمة فتحرق بنزين أكتر، فحاول تاني معلش. أكيد في شوارع أحسن انت لسه ماكتشفتهاش، دور وانت وعربيتك الكسبانين

بتحمل اوزان كبيرة في العربية

توصيل قرايبك للمطار وطنطاتك بعيالهم كلهم للفرح و9 من صحابك قاعدين ع الكنبة عشان تطلعوا الساحل ده غير الشنطة اللي فيها حاجتكم كلها،

كل ده بيخلي العربية تسحب بنزين أكتر عشان تقدر تقاوم الاوزان دي كلها وتمشي ع الطريق ..

ما هو يا تعمل فيها سبع رجال وتسيبها تاكل بنزين وماتفتحش بوقك، يا تخف الأحمال شوية وصدقني هي هتشيلك ومش هتفتح بوقها

بتسوق غلط

في فرق بين بتسوق وحش وبتسوق غلط، انت أه بتعرف تسوق حلو، وحلو أوي كمان، بس عربية صني في صلاح سالم لا هي عربية سباق ولا انت ماشي في مضمار ومستني خط النهاية.

فـ اهدى كدة وقول هديت لأنك بتحرق بنزين ع الفاضي ده غير حرقة دم اللي سايقين حواليك والسكان واللي بيعدوا الطريق واللي بيفكروا يعدوا بعدك كمان.

فبما ان عربيتك كل مهمتها في الحياة انها توصلك الشغل وترجعك البيت بعيد عن زحمة المواصلات،

ماتحاولش تديها أكبر من حجمها وسوقها بسرعة تناسبها وتناسب الطريق،

هتوفر البنزين وهتوفر أصوات جانبيه ماتحبهاش ولا تتمناها.

العربية واقفة! .. بطلها

طابور البنزينة والإشارة اللي بتقف فيها أول واحد والزحمة في أوقات الذروة وصاحبك أو صاحبتك اللي بتستناهم عقبال ما يخلصوا لبس …

كل ده بيقول ان العربية واقفة مستنية، فطالما العربية واقفة ومستنية، يبقى نبطلها لحد ما نقرر نطلع بيها تاني.

لأن ده ببساطة حرق بنزين ع الفاضي. وزيادة في استهلاك البنزين احنا في غنى عنه، والحل انك تريح عربيتك والماتور حبه وانت الكسبان في الأخر

المكان لو أخر الشارع العربية لازمتها ايه؟

خبراء العربيات بيقولوا على الأماكن القريبة أو الطرق القصيرة يعني، إنها عدو المحرك اللدود، فمالهاش حل تاني.

لو اللي معاك مكسل يمشي ومصمم يركب حاجة، ممكن تخيله يطلب هو تاكسي، التاكسي هيتصرف بعدين.

بس انت سيب العربية مركونة وخدها مشي المشي رياضة.

طبعا انا بكلم الناس اللي عاوزة توفر استهلاك البنزين، أما اللي بينزل يركب العربيه عشان يروح السوبر ماركت اللي في الشارع اللي وراه ويرجع تاني،

ده عارف هو بيعمل ايه وبيدفع كام في الجيم عشان يمشي شوية ع التريدمل وهو بيسمع  new rulesلـDua lipa ، انت اسمع Human  ولا Believer  وانت ساكت.

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *

‫شاهد أيضًا‬

كيف تحدد عمر اطارات السيارة و6 إشارات تدل على ضرورة تغييرها فورا

اطارات السيارة من الأجزاء الهامة جدا، بل تعد الأهم على الإطلاق. فهي الجزء الوحيد في السيار…